𝗡𝗜 8 𝗖𝗛𝗛𝗨̂𝗡𝗚 𝗖𝗛𝗛𝗨𝗠 𝗟𝗢 𝗖𝗛𝗔𝗧 𝗟𝗢𝗩𝗜𝗡 𝗔𝗡 𝗜𝗡𝗗𝗢 𝗧𝗔!
(𝙸𝚜𝚛𝚊𝚎𝚕-𝙸𝚛𝚊𝚗 𝚝𝚑𝚞 𝚊 𝚒𝚗𝚑𝚖𝚞 𝚝𝚑𝚎𝚒 𝚕𝚘, 𝙸𝚜𝚛𝚊𝚎𝚕-𝚒𝚗 𝙸𝚛𝚊𝚗 𝚗𝚞𝚌𝚕𝚎𝚊𝚛 𝚛𝚊𝚕𝚝𝚑𝚞𝚊𝚖 𝚜𝚒𝚊𝚖𝚗𝚊 ṭ𝚑𝚒𝚊𝚑 𝚟𝚎𝚔 𝚊𝚗 𝚙𝚑𝚞̂𝚝)
𝓟𝓱𝓾𝓪𝓱𝓴𝓱𝓪𝔀𝓶𝓽𝓾:
~ Zoa Tlau (21.6.25 zing dar 6)
Buannel Cabin
Ram pahnih thu a inhmu thei lo a, Israel hian nawrtu tam tak nei mahse Iran-in 'nuclear ralthuam' a siamna chu a ṭhiat vek a nih loh chuan an bei zel dawn tih an sawi a. Iran lam lahin Israel-in an beihna a tihtawp hma chu US nena 'nuclear inbiakna' an neih loh tur thu an sawi ve thung. Israel-in thah a tum Iran supreme leader Khamenei thah anga tlangthang chu thu dik lo a ni a, a chanchin erawh tun darkar 24 chhungin a reh hle.
𝗚𝗲𝗻𝗲𝘃𝗮 𝗺𝗲𝗲𝘁𝗶𝗻𝗴:
Thu thar, danglamna thlentu tur, a awm rih lo bawka tawi te tein kan ziak ang. Nimin lama Iran foreign minister leh UK, Germany, France leh EU aiawh te Geneva-a an inbiakna nghahhlelhawm zet chuan tun dinhmunah indo tihtawpna lam a hring lo a. Inbiak chhunzawm leh zêl erawh an tum thung.
𝗨𝗡 𝗦𝗲𝗰𝘂𝗿𝗶𝘁𝘆 𝗖𝗼𝘂𝗻𝗰𝗶𝗹:
Geneva meeting neih hma khan UN Security Council meeting neih a ni a, Israel leh Iran indona sosâng zêl tur tihtawp bawk an thupui. China palai Fu Cong chuan Israel chu Iran bei tawh lo turin a ti a, Iran nuclear bungrua beihna chuan chhiatna nasa zawk a hrin a hlauh thu UN meeting-ah hian a sawi a, 'nuclear issue' a inbiakna ṭha a awm leh thuai thuai chauhin remna a awm a beisei.
𝗡𝗔𝗧𝗢 𝗮𝗻 𝗶𝗻𝗵𝗺𝘂𝗸𝗵𝗮𝘄𝗺 𝗱𝗮𝘄𝗻:
North Atlantic Treaty Organisation (NATO) ram te chu Hague, Netherlands-ah June 24 & 25 khian an inhmukhawm dawn a. Israel leh Iran indona hi an thupui ber pakhat a ni ang.
Kum 1949 khan NATO hi din a ni a, tunah hian ram 32 an awm mêk. North America lamah US leh Canada an ni a, a bak zawng chu Europe ram 30 an tel. Israel hi 'non-NATO ally' tiin an sawi ṭhin a, NATO member ni si lo, NATO thurualpui an ni.
𝗧𝗿𝘂𝗺𝗽-𝗮'𝗻 𝗮 𝗺𝗶 𝗹𝗲𝗵 𝘀𝗮 𝗿𝗲𝗽𝗼𝗿𝘁 𝗮 𝗵𝗻𝗮𝘄𝗹:
Tulsi Gabbard, US director of national intelligence-in Iran nuclear zirchianna an team-in an neih hnuah 'nuclear ralthuam' siam turin hma a la lo tih a report tawh a. He report hi Donald Trump chuan a hnawl chhunzawm zêl a, Iran chu 'nuclear program' titawp turin a la nawr zel. Gabbard sawi dan chuan Khamenei hian kum 2003 aṭang khan 'nuclear ralthuam' siam a tum chu a tharthawh tawh lo tih a sawi.
𝗜𝘀𝗿𝗮𝗲𝗹 𝗰𝗵𝗮𝘂𝗵𝗶𝗻 𝗻𝘂𝗰𝗹𝗲𝗮𝗿 𝗿𝗮𝗹𝘁𝗵𝘂𝗮𝗺 𝗮 𝗻𝗲𝗶:
Tony Karon, Al Jazeera managing editor, chuan Middle East-ah Israel chauhin nuclear ralthuam a nei tih a sawi a. Hemi humhim reng tur hian USA leh Europe khawthlang ram ten ṭan an khawhpui reng tih a sawi. Israel bakin nuclear ralthuam a neih remti lotute lian ber chu US leh West Europe an ni tiin a dem thu a sawi.
𝗔𝗺𝗲𝗿𝗶𝗰𝗮𝗻-𝗜𝘀𝗹𝗮𝗺𝗶𝗰 𝘁𝗲𝗻 𝗮𝗻 𝗻𝗴𝗲̂𝗻:
Council on American-Islamic Relations (CAIR) te chuan US sorkar chu Iran laka Israel-in 'zero poison' an ngiat chu tawlh a, inremna siampui thuai turin an ngên ve leh ta. Uranium tichak (enrichment) a, u-235 bika 90% a tihchak a nihin nuclear ralthuam siam theih a ni a. Iran hian hei hi an kalpui niin Israel hian a hria a, mahse khawvela nuclear endiktu thunei ber IAEA erawhin hei hi chu a ni chiah lo niin a hre thung. Israel duh anga 'Iran uranium enrichment' hi kalpui a nih hian remna a thleng thei lo tiin, American-Islam te chuan Nuclear Non-Prolifiration Treaty phal china tawlh hreta remna siam turin US an ngen.
(𝚂𝚘𝚞𝚛𝚌𝚎𝚜: 𝙺𝚑𝚊𝚠𝚝𝚑𝚕𝚊𝚗𝚐 𝚖𝚎𝚍𝚒𝚊 𝚛𝚎𝚙𝚘𝚛𝚝 𝚝𝚑𝚎𝚗𝚔𝚑𝚊𝚝 𝚕𝚎𝚑 𝙹𝚘𝚛𝚍𝚊𝚗 𝚊𝚝𝚊𝚗𝚐𝚊 𝙰𝚕 𝙹𝚊𝚣𝚎𝚎𝚛𝚊 𝚛𝚎𝚙𝚘𝚛𝚝 𝚕𝚊𝚔 𝚔𝚑𝚊𝚠𝚖 𝚊 𝚗𝚒)
