MRI khawl leh khawl dangte mipute'n tangkai taka an hman ka beisei ani -;PU K. SAPDANGA, UD & PA Minister
Rauthla 10.06.2025 (Thawhlehni) : Vawiin khan Aizawl Smart City Limited, Urban Development & Poverty Alleviation Department hmalaknain Aizawl Civil Hospital-ah MRI khawl, mipuite tana tlangzarhna leh bungraw dangte hlanna hun hman a ni. He hunah hian Pu K. Sapdanga, UD&PA Minister chu khuallian a ni a, khawl inhlanna hun hi Aizawl Civil Hospital Conference Hall-ah neih a ni. Pi Lalrinpuii, Hon’ble Minister, H&FW Department pawhin he hun hi hmanpuiin Pu Lalmalsawma Pachuau, Secretary, UD&PA Department chuan inkhawm hi a kaihruai a, khawlte hi Aizawl Smart City Limited, UD&PA hmalaknaa lei niin Pu K. Sapdanga, UD&PA Minister hian Aizawl Cilvil Hospital hnenah a hlan a ni.
Thu sawiin Khuallian chuan Mizo mipuite, a bik takin mi rethei leh harsa zawkte tan phei chuan tihdamna hmunpui ang hiala kan ngaih, Aizawl Civil Hospital hmasawnna atana thawktute zinga a telve thei chu lawmawm a tih thu a sawi a. Civil Hospital-in MRI khawl an nei tur chu thlamuanthlak a tih thu sawiin mipuite tan a nih thu a sawi a. Mizo Doctor thiam tak takte pawhin hmanrua kan neih that tawk loh avanga an thiamna leh theihna te a nih tur anga an hman chhuah theih loh fo thinnate pawhin ziaawm lam a pan chhoh zel a beisei thu a sawi bawk. Doctorte hlutzia leh an tawngkam khat lek pawhin damlote a thlamuan theihzia sawiin midangte thlamuantu ni fo turin a chah bawk a, MRI khawl leh khawl dangte pawh mipui rawngbawlna atan tangkai taka hmang zui zel turin duhsakna a hlan bawk a ni.
Khual zahawm Pi Lalrinpuii, H&FW Minister pawhin Aizawl Smart City hmalakna fakawm a tih thu sawiin Department hrang hrangte inkara thawh hona tha a awm chu lawmawm a tih thu a sawi a. Public hospital-te hi mi harsa zawkte tan a pawimawhzia sawiin thawm tha tura Mizoram sawrkar hmalak meknate a sawi a. PHC leh CHC thawm that a nih thu te, MUHCS hnuaia damlote tan ICU indaih lohna awm thin tihziaawm a nih theih nan, ZMC-ah ICU sawm pathum (13) siam belh a nih dawn thu te, Siaha, Lunglei leh Champhaiah pawh ICU panga (5) theuh siam a nih tur thute a sawi bawk a; hun rei loteah Kal thlak (Kidney Transplant) pawh kan tih ve thei tawh dawn thu a sawi bawk
Aizawl Smart City hmalakna hian tun hnaiah sawrkar leh private hospital hrang hrangte tan Ambulance pariat lei a lo ni tawh bawk a; Tuirialah Common Bio-medical Waste Treatment plant cheng nuai 801.15 sengin din a lo ni tawh bawkin, April 2025 atang khan hman tan a ni tawh a ni.
