Rauthla 09.06.2025 (Thawhtanni) : Pu K.Sapdanga chuan police mass recruitment chu Pathian zarah an zo ta tih tarlangin, 'Chief Minister-in fair tluantling taka tih a duh thu a sawi. Chu chu tihhlawhtlin tumin theihtawp kan chhuah a, kan hlen chhuakin kan inhria,' a ti. Recruitment-a mawh-phurtu Police Officer-te pawhin 100% fairness an kalpui tih finfiahna pawh neia an inngaih thu tarlangin HM chuan, process chhunga dan bawhchhia mi aiawha lemchan tum thubuai 4 siam a ni a, mi 10 man an nih thu pawh a tarlang.
Home Minister Pu K Sapdanga chuan result puan hlimah an lawm a kim lo tih tarlangin, 'Kan hriat-thiampui. Thla a lo vei ang a, kum a lo vei ang a, kan auhla tur a la nih kan beisei. He recruitment thianghlim tak hian fak a hlawh ngai a nih chuan, fak hlawh phu ber chu Chief Minister hi a ni,' a ti.
He tih mek lai hian Mizoram Police chuan thuchhuah siamin, inrinnia khan police constable lak a nih dan an tarlang. Mizoram Police tarlan danin, recruitment felfai, langtlang leh dik neih a nih theih nan Mizoram Sawrkarin hetiang lama rintlak leh tawnhriat lo nei tha tawh Infoclab Solutions Private Ltd, Delhi a mi chu a ruai (hire), an ti.
Infoclab-te hian Radio Frequency Identification (RFID) leh Biometric Identification Technology hmangin Physical Efficiency Test, Physical Standard Test, Interview leh Written Examination thlengin an endik a ni. Written exam endik hna hi mithiamte ruaiin, Optical Mark Recognition (OMR) system hmangin endik vek a ni. Langtlang leh felfai taka he recruitment hi kalpui niin, pawnlam inrawlhna pakhatmah awm lovin, a ti tha apiang (merit ang chiahin) tlinga puan an ni, an ti. Tlinga puan takte hian, medical test leh police verification an paltlang a la ngai bawk dawn a. Recruitment chhung hian, document lem hmang leh mi aia lo inlan (impersonation) te pawh man chhuah niin criminal case pali (4) ziahluh (register) a ni a, heng thil dik loa inhnam-hnawih mi 10 lai man an ni tawh, an ti.
Tlinga puan takte hian, medical test leh police verification an paltlang a la ngai bawk dawn. Recruitment chhung hian, document lem hmang leh mi aia lo inlan (impersonation) te pawh man chhuah niin criminal case pali (4) ziahluh (register) a ni a, heng thil dik loa inhnamhnawih mi 10 lai man an ni tawh.
