LAWMTHU SAWINA
Kan fapa, Lalzedingliana Dt. 28.5.2025 a Țiau leh Chhimtuipui infinnaa chesual chu Nimin Dt. 2.06.2025 zing lam dar 2 Am vel khan a chenna khua Pangkhua thlanmualah kan inphum fel ta.
Kan fapa chetsualna hian Zoram mipui tam tak a tibuai hlein kan hria a, pawi kan tihna leh kan zahna hi a inchen viau ang le.
Keini teh lul chunga in mi hmangaihna leh khawngaihna ka hmuh hian lungngai indawm kuna tap ngam tur ni hian kan in hre lo. Keini Chhungkua teh lul chunga Pathian hnathawh ropui tak a mite kaltlang lo lang hi kan phu mawlh hian kan inhre lo a ni.
A chetsual ni atanga a ruang zawnna hna min thawh saktu - Branch YLA, Pangkhua leh VC, YMA Muallianpui, YMA Bualpui (H) , Bungtlang ( Myanmar) te chungah kan va lawm em! A sur a sa thlu lo leh Vaihmite leng karah luiah riakin ruang hmuh anih theih nan theih tawp inchhuah a, in inpekna hi a va ropui teh lul em! In chungah lawmthu kan sawi tak meuh a ni.
Ruang hi hmuh lawk anih loh avangin kan mang a ang em em a, hmuh anih ngei theih nan Pangkhua nu le pa, kohhran hrang hrang leh a chanchin hria apiangin Pathian ngenngawl takin atan leh a chhungte tan tawngtaina in nei tih kan hria. Kan va han lawm tak em! In tawngtaina avangin kan fapa hian mak tak maiin ruang hmuh a ni tih awm ngai lohna tur Bay Of Bengal Tuipui thleng hman loin Longmasu khawbul teah min lo dahthat sak ta a ni.
Ruang min lo chharsak a, hmun himba lo dahtu leh Longmasu MTP chungah kan ka va lawm tak em!. An nin an hriat ngai loh mah nise, khawngaihna a lo enkawlin an lo tuam hlawm a, kuang tha tak lo buatsaih sakin a tul ang zela chechhuak zel turin an in pe tih kan hre phei chu kan lawmna hi a thuah hnih kan ti lo thei lo. An theih ang anga information pe chhuakin kan beiseina thamral mek chu beiseina nung min neihtir leh a ni. Phura MTP lam pawh he ruang phurh thlen anih theihnan an inpekna te kan hre zel phei chu kan va han lawm tak em! An chungah pawh lawmthu kan sawi mawlh mawlh a ni. Tin, ruang phurh thlen anih theih nan a, inhuam a, theihtawp lo chhuahtu General Hqtrs MTP Siaha leh an branch hrang hrangte chungah pawh lawmthu kan sawi tak meuh a ni.
Signal mumal loh avangin information inpek a chiang kuang thei lova, pawi kan ti takzet. Chutiang karah Central YLA hruaituten theih tawpin hma min laksak a, ruahmanna siam zung zungin an motor te nen lam an thawhchuahpui a, an ruahmanna hnuaiah he kan fapa ruang hi kan veng a lo thleng a ni kan ti lo thei lo. An chungah lawmthu kan sawi tak meuh a ni.
An nun thap meuh a tuilian karah ruang Longmasu a min va laksaktu leh an khua atanga Ngengpuitlang thleng min lo dahsaktu Branch YLA Hruitezawl le VC te chungah kan va lawm tak em.. An chungah lawmthu kan sawi tak meuh a ni.
Ruang lo dawngsawng a, ruang Lawngtlai thleng lo thlentu Branch YLA Ngengpuitlang te chungah kan lawm tak zet a ni. Lawngtlai thlen hmaa ruang lo hmuak a, thilpek nen lo dawng sawngtu Branch YLA zawng zawngte -Ngengpui, Mampui etc. te chungah kan lawm takzet a ni. Mampuiah hian Rev. VL Rema BCM Pastor in tawngtaina nen thlap a lo thlah a ni tih kan lo hria a, a chungah pawh lawmthu kan sawi tak meuh a ni.
Lawngtlaiah CYLA hruaitute leh Pangkhua Welfare Lawngtlaia awm ten lo dawng sawngin Postmortem anih theih nan an lo buaipui vek a, a naktuk ah Postmortem in thilpek tam tak nen Khua lamah ruang an rawn thlah bawk a ni. Pangkhua Welfare member zawng zawng chungah leh CYLA hruaitute chungah lawmthu kan lawm takzet a ni. Lawngtlai a, ruang lo dawngsawngtu Pu Siangchungliana a chungah leh thlahna tawgtaina neihsaktu - P/P K. Sanglianchunga te chungah lawmthu kan sawi bawk a ni.
Bialtu MDC Pu BN Thangpuia ten an phaktawk lo chuah vein ruang lo hmuakin a nupui Pi Puii pawhin ruang hi Pangkhua thleng a lo zui a ni. An chungah lawmthu kan sawi tak meuh a ni.
Kal kawnga lo hmuak a, ruang thlahtuteTlai lam chawhlui lo buatsaihsaktu Kawlchaw YLA chungah kan lawm takzet a ni. Sub Hqtrs YLA Siaha ten ruang hi lo dawngsawngin thilpek tam tak nen, hruaituten khua thleng ruang hi an lo thlah a, an chungah kan lawm tak zet a ni . Tin, Pangkhua Welfare Siaha te chungah lawmthu kan sawi bawk a ni.
Tin, Thingpui nen Ruang lo hmuak a, ralna thilpek lo hlantu Branch YLA Lungzarhtum, Bualpui Ng, Siachangkawn, S. Lungpher, Rawlbuk, Cheural leh Sub.Hqtrs Sangau leh Town branch hrang hrangte chungah lawmthu kan sawi mawlh mawlh a ni.
Zoram mipui hriat a, kan fapa thihna tlawm tak min pholansak tu leh vehbur hial min khawnsaktu Vantong Official Youtube channel neitu hnenah lawmthu kan sawi tak meuh meuh a ni. He channel kaltlang a, ralna thilpek minte zawng zawngte, in zavai chungah lawmthu kan sawi tak meuh a ni.
A tawp berah chuan bul min tansak a, zan tam tak mut mu pawh tuah lo a a tawp min thlentu - Pangkhua YLA leh VC te chungah lawmthu kan sawi nawn leh a ni
Information kan dawn loh avanga kan hriat loh tam tak kan fapa ruang zawn chungchang a ni emaw, senghawi leh phurh thlenna leh ralna pek chungchangah lawmthu kan sawi lohna a awm ngei kan ring. Eng pawh nise kan hriat lohnaah min ngaidam turin kan ngen tak meuh che u a, in zavaia chungah kan lawm takzet a, *Lalpa'n a let tam takin a malsawmnain vur che u rawh se* tih hi kan tawngtaina a ni tih min lo hriatsak hram dawn nia.
In khawngaih lainatna dawngtu
Lalrotluanga
F/o Lalzedingliana ( L)
Pangkhua
