Mualbu ‘L’ Primary School naupangte'n zirtirtu an mamawh
Ruathla 09.06.2025 (Thawhtanni) : Joint NGO Committee, Mualbu ‘L’ te chuan, Govt Primary School, Mualbu ‘L’-ah Zirtirtu thawk nghet pahnih leh Provional Employee (PE) pahnih an nei thin a. An Headmaster pension-in a chhuak a, a nghet lo pahnih an neihte’n an term an lo hmang zo tawh bawk a. Tun dinhmun ah hian zirtirtu pakhat chiah an nei a. Zirtirtu pakhat chauh tan School naupang sawmnga (50) dawn enkawl theih a ni lova. Chumai chu ni lovin zirlai naupangte pawh zirna kawngah an khawngaihthlak em em a ni, an ti a.
Khawtlang hruaitute chuan an dinhmun te ngaihtuahin, zirlai nu leh pa te an mangang hle tawh a. Govt Primary School Mualbu ‘L’ ah hian zirtirtu awmsa pakhat bakah hian pali (4) tam min pek belh / dah belh kan ngen tlat a ni, an ti a. Tunah District Council ah sorkar mumal tak kal thei lo mahse, posting & transfer a tih theih hun hmasa ber leh Governor in stay order a hlih rual a, LADC Education Dept ten zirtirtu min dah sak nghal turin kan phut tlat ani, tiin thuchhuah an siam.
Joint NGO Committee Mualbu ‘L’ te chuan Primary School a zirtirtu dahbelh tura sorkar an ngenna chu ah hlawhtling lo anih chuan tun aia thuk zawka hmalak an tum thu an sawi a. LADC a sorkar thar a awm hun ah theihtawp chhuahin zirlai naupangte’n zirtirtu an neih ngei theihna tura hma la ngei turin sorkar chu an ngen a ni.
