Panchayat Advancement Index (PAI) 1.0 Report Card tlangzarh.
Rauthla 06.06.2025 (Zirtawpni) : Vawiin chawhma khan Prof. Lalnilawma, Minister, Rural Development and Administration Department chuan a pisa ah Panchayat Advancement Index (PAI) 1.0 Report Card a tlangzarh.
RD & A Department Minister chuan PAI 1.0 Report Card siam a nih theihna tura theihtawpa hmalatu Department Officials-te leh report thehluttu Village Council-te chungah lawmthu sawiin PAI Report Card chu ram hmasawn dan dinhmun tarlanna darthlalang pawimawh tak a nih thu a sawi a. Ram hmasawnna atan Village Council ten Sawrkar hmalaknate theihtawpa an thlawp a tul thu a sawi bawk. Suarhliap Village Council, Mamit District-in 68.89 mark hmuin, Mizoramah mark hmu sang ber a ni chu a lawmpui thu a sawi a, PAI 2.0 Report Card tha zawk neih a nih theih nan leh National Panchayat Award lawmman hial la thei turin Department leh Village Council tin ten Sawrkar hmalakna hrang hrang ngai pawimawh lehzuala, data tha leh rintlak neia report felfai a hun takah buatsaiha thehlut zel turin a chah.
He hunah hian Pu Chuauhnuna, Director, Local Administration Department chuan Panchayat Advancement Index chungchang a sawifiah a. Sustainable Development Goals (SDGs) tihlawhtling tura khawvel ram 193 zinga intiamna hming ziaktu zingah India pawh tel vein, SDGs goal 17 chu tualchhung mil tura her remin Localisation of Sustainable Development Goals (LSDGs) theme 9-ah siam a ni a. Panchayat Advancement Index (PAI) Report Card hi khaw tinte LSDGs tih hlawhtlinna kawnga an dinhmun leh thlen chin hriatna a ni. PAI data hi khaw tin tana hmasawnna tur ruahmanna (plan) thar siam nan leh Village Council ten National Panchayat Award an lak theihna tura kawng pawimawh tak a nih thu a sawi.
Vawiina RD&A Department Minister-in a tlangzarh PAI 1.0 Report Card atana zir chian kum chu Financial Year 2022-2023 a ni a. Tunah hian PAI 2.0 atan hmalak leh tan mek niin, a zir chian kum tur chu FY 2023-2024 a ni. PAI Report Card hi https://pai.gov.in/ ah a en theih a, a tlangzarhna hi Local Administration Department Youtube channel ah a en theih bawk a ni.
PAI 1.0 ah hian Mandatory Indicator 384 leh Optional Indicator 124, a vaiin Indicator 508 hman a ni a. A score-sheet hi a hnuai ami ang hian tarlan a ni
