Reijnders manah €55m-in City leh Milan inrem
Rauthla 06.06.2025 (Zirtawpni) : Tijjani Reijnders man chungchangah Manchester City leh AC Milan te chu €55million (£46.3m)-in an inrem ta a, hetah hian add-ons a la te bawk. May thla khan Man City chuan Reijnders lak tumin Milan an lo dawr tawh a, tunah inremna an nei fel tawh a, Dutch midfielder Reijnders hian kum 5 chhung atan Etihad Stadium-ah contract a ziak ang. Netherlands international hian tun hnai mai khan Milan-ah contract thar kum 2030 thleng daih a ziak a, season liamta khan a khel tha hle a, competition hrang hrangah AC Milan tan goal 15 a khung a, Serie A midfielder of the Year atan thlan a ni nghe nghe.
Kevin de Bruyne a chhuah dawn avangin Man City midfield thawm chak a ngai, Pep Guardiola chuan an mamawh player a dap nghal char char a, Rodri nena inkawp turin Reijnders hi a thlang ta chat a ni. ACL injury avangin hun rei tak Rodri a chawl a, Ballon d'Or winner hi season hmasa tawp lam khan a dam hman a, harsatna dang a nei lo a nih chuan, season thar bul a tan theih a rinawm.
Reijnders hian kum 2023 khan AZ atangin Milan a zawm a, Netherlands tan game 22 khel tawhin, kum 2023 khan senior-a a debut game a khel a, 2024 European Championship-ah pawh khan semi final a luhpui a ni. Hetih lai hian Manchester City hian Ryan Cherki chu mimal thilah inremna an neih pui thei bawk a. City hian Lyon hnenah Cherki lei chhuah dilna te an thlen ang a, kar tawp lam hian inbiakna an neih hman beisei a ni.
Tun season transfer ah hian City hi club dang rualin a theih anga tha a inthuam that an tum chho mek a, Premier League a pathumna an hauh thei hram chu an la na deuh niin a lang a, hei vang hian players tha leh an it zawng te Etihad lamah hian seng luh tumin hma an la ngawrh hle a ni. Season thar tur atana players indawr kualna leh inleina vel chanchinthar hi a ngaihnawm chho zel dawn niin a lang.
