Rauthla 09.06.2025 (Thawhtanni) :Govt High School Tlabung atanga mathematics zirtirtu sawn chhuah tumna a awm chu an duh loh avangin mipui ten ni 6.6.2025-a zirtirtu leh zirlaite sikul kai tur an dan hnuah, sorkarin zirtirtu a transfer chhuak tur a la dan chhunzawm zel a ni. Tlabung Zodin VCP P Vanlallawma hnen atanga thudawn danin, Nimin (8.6.2025) chu Pathianni a nih avangin hnamdang an in duty chhawk a. Zing atanga tlai dar 2 thleng Hindu Welfare Society an duty a, dar 2 atanga zan thleng Young Pahari Association-te ve thung a, zanah lamah Young Chakma Association an duty ve bawk a ni. Heng duty te hi mumal taka a kal theihna turin Village Council lam ten an ho thung a ni. He thu buatsaih lai thleng hian sorkar atangin thu lawmawm engmah an la dawng lova. Hemi anih avang hian zirtirtu transfer chhuak tur dan leh sikul kai tur dan chu la chhunzawm zel an tum a ni.
Tlabung khawtlang hruaitute sawi danin, Govt Modern High School, Lungtiana mathematics zirtirtu chu Aizawlah transfer a ni a, hemi thlakna atan hian Govt Tlabung High School-a mathematics zirtirtu chu transfer ve leh a ni. Khaw dang buaina chinfel nana Tlabung an hmang chu Tlabung mipuite chuan duh loin, zirtirtu leh zirlaite sikul kai tur leh transfer tak chhuak tur hi an dang a ni.
