TRUMP-PUIA 'Thawn haw Policy' kal zêlah Los Angeles 'Curfew' an puang ta!
~ Zoa Tlau (11.5.2025) Buannel Cabin
US President ṭum hnihna nikum lama a chelh leh khan Donald Trump hian an rama 'dan lova pêm' (immigration) te thawn haw policy a lo neih tawh chu nasa lehzualin a chhunzawm a. US-a dan lova pêm leh sahimna zawng (assylum seeker) maktaduai têl an man a, an khungkhawm a, an thawn haw. Kum 2024 inthlana a inzawrhna a lo nih tawh angin a che na hle a ni.
Trump-a hian U.S. Immigration and Customs Enforcement (ICE) te hi 'illegal immigrants' thawn haw leh an chunga hmalakna hrang hrangah thuneihna sâng tak a pek avangin an che na hle. Anni hian January 23 aṭang khan sorkar hmasa (Biden sorkar) kalphung letling hlauhin; school, hospital leh Pathian biakna hmun te chu luhchhuah hmiah hmiah thei tura thuneihna pek an ni. 'Warrant' nei loa 'illegal immigrants' te an enfiah zêl avang hian boruak a sosang nasa.
Tunah hian 'illegal immigrants' hi US hian maktaduai 11 vel a mikhual a, California hi a ngah ber an ni a. Los Angeles pawh a boruak nei lian ber an nih mêk hi.
2016-ah khan Trump President rorelna hnuaiah hmun 3-a ṭhena hmun 1 vel khan thawn haw hi an thlawp a. Tunah erawh mipuiin an thlawp deuh vek a, mahse April 2025 a nih meuh chuan an kalpui dan chu a lutuk ta tih hi US mipui chanve vel ngaihdan a ni a. April 2025 thlengin 140,000 vel thawn haw tawh niin an sawi.
ICE hian US khua leh tui; Trump-a rorelna sawisel thlengin a vaihma a, visa neia khualzin, zirlai adt. pro-Palestinian leh cheng nghet sa man leh thawn chhuah te an nei.
LOS ANGELES BUAI TUAL TUAL, 'CURFEW' LEH NATIONAL GUARD adt.:
Ni li chhung vel zet a ni tawh ang Trump-a policy leh ICE chet dan dodalna kal mêkah Los Angeles, California khawpuia dodalna chu US chanchin langsâr ber a la ni mêk a.
An Mayor Karen Bass chuan LA (downtown) khawpui laili bikah an ram sana zanin (keini vawiin) dar 8 aṭanga zing dar 6 thleng Curfew a puang ta! CNN puan danin he buaina ni 4 chhung vel hian 378 vel an man tawh a, nizan khan 200 vel an man. Sumdawnna hmun 38 lâi an rawk bawk niin Mayor hian a sawi.
Buaina avanga National Guard hman leh Marines thlenga ruahman chuan sawisel a hlawh nasa hle a. Tunah hian US Marines 700 chu federal chungchangah duty-tir an ni nghe nghe.
Los Angeles Governor Gavin Newsom hi huaisen taka Trump-puia beitu langsar ber pakhat a ni a, a thusawi hnuhnungah pawh 'democracy' chu pawngsualin a awm mêk tiin, US Congress meuh pawh Donald Trump-a hnuaiah an kûn vek niin a sawi.
Los Angeles chauh hi 'protest' an ni lo a, New York-a te pawh buaina hi a thleng a, hmun hran hranah an buai nuai nuai mai. Hetih mêk lai hian Trump chuan Elon Musk chu a sawisel loh thu 'social media' lamah a lo 'post: zeuh a, Musk hian 'thinlung sen' hmangin a lo 'react' zeuh bawk!
