LAWNGTLAIAH WORLD BLOOD DONOR DAY HMAN A NI
Rauthla 13.06.2025 (Zirtawpni) : Kum tina hman thin World Blood Donor Day chu Lawngtlaiah pawh vawiin khan YLA Golden Jubilee Hall-ah hman niin, kumin World Blood Donor Day thupui hi 'Give Blood, give hope, together we save lives' tih a ni.
Pu Beichhita, Vice President, AVBD, Lawngtlai kaihhruai he hun hmannaah hian Central YLA President Pu F. Lalrothanga chu khuallian a ni a. Rev. K. Lalrochama, Adviser in hunserh hmangin, T. Lalhlimpuii leh Krista Roluahpuii te an zai a, Pu Pc. Chuaudinga, Adviser in thu a sawi bawk.
Khuallian Pu F.Lalrothanga chuan, Thisen pek hi ringtu kan nihna zawn atangin kan tih tur a ni a. Chutiang bawkin tlawmngai pawl kan nihna ang pawhin hei hi rawngbawlna pawimawh tak anih avangin theihtawp kan chhuah tlan zel a tul ani, a ti.
Vawiin hun hmannaah hian AVBD, Lawngtlai Secretary VL. Hmangaihzuala chuan report pein, lawmthu sawina a nei a, lawmman semna hun a kaihruai bawk.
Kum kalta chhunga Kohhran pawl anga thisen pe thate hnenah lawmman sem niin, kum kalta chhunga unit anga thisen pe tha te chu hengte hi an ni.
Unit anga lawmman late:
1. TKP Maranatha Unit - 52
2. TKP Lawngtlai Vengpui Unit - 31
3. TKP Bazar Veng Unit - 25
Bial anga lawmman late :
1. LIKBKTP AOC Pastor Bial - 61
2. TKP Bungtlang 'S' Pastor Bial - 55
3. LIKBKTP Paithar Pastor Bial - 47
Pawl dang lawmman late :
1. NSS Unit, GLC - 117
2. YLA M Kawnpui Branch - 47
3. NSS Unit, GRHSS - 30
