LAWNGTLAI DISTRICT EDUCATION COMMITTEE THUKHAWM
Lawngtlai, 21st October 2025: Vawiin khan Lawngtlai District Education Committee chuan an Chairman leh Bawrhsap nibawk Pu Donny Lalruatsanga hovin DC Conference Hall-ah thutkhawm an nei.
Pu Donny Lalruatsanga chuan Zirna lamah hmasawnna awm turin zirtirtute bakah nu le pa, NGO leh mipuiten mawhphurhna lian tak an nei ve a ni, a ti. A bik takin Lawngtlai District - chu Zirna lamah a hniam hle tih tarlangin, Zirna tihmasawn turin theihtawp chhuah a tul tak zet tih a sawi a. Lawngtlai District - chu Autonomous District Council (ADC ) hnuai a nih angin Mizoram sawrkar hnuaia Education Department bakah LADC leh CADC hnuaiah School engemaw zat a awm a, heihian harsatna thleng lo a, hmasawnna zawk a thlen theih nan thawhhona tha tak a awm a pawimawh hle a ni, a ti. Zirna kawnga District dangte entawntlak ni tura theihtawp chhuah tura District Education Committee- te chahin, Pu Donny Lalruatsanga chuan Lawngtlai District- mipuite pawh tha taka tawiawm thin turin a sawm nghal bawk.
Thutkhawmah hian Pu H. Laltanpuia , Addl. DPC Samgra, Lawngtlai chuan Lawngtlai District-chhunga Primary School atanga Higher Secondary School thlenga hmasawnna hnathawh hrang hrangte leh hmabak hnathawh turte tarlanna leh sawifiahna a nei a. Zawhna leh chhanna hunte hman nghal a ni a. Thutkhawm chuan Elementary, Secondary leh Higher Secondary School Annual Composite Grant - chu uluk zawka vil leh endik thin ni se tiin, a hma lamah thutkhawm neih leh ni se an ti a ni.
Vawiin thutkhawmah hian Lawngtlai District Education Committee Member - te an telkim tha hle a, Pu Donny Lalruatsanga chuan lawmthu sawina neiin hun a khar.
Lawngtlai District chhungah hian Primary School atanga Higher Secondary School (Private, LADC, CADC,Dept. of Education, Samagra) - 646, ICT School - 49, leh PM Shri School - 3, a awm mek a ni.
Written by: Zonunchama Ralte, MIS, DIPRO -Lawngtlai, Dated: 21st, October, 2025
