AIR INDIA THLAWHNA BOEING 787-8 DREAMLINER CHESUALA CHUANG MI 242 AN THIH VEK AN RING
(Zohnahthlak Cabin Crew Lamnunthem Singson (LS) a tel ve)
Rauthla 13.06.2025 (Zirtawpni): Nimin chawhnu dar 1:38 (local time) a Air India Flight AI171, (Boeing 787-8 Dreamliner), Ahmedabad Airport atanga London Gatwick pan tur chu a thlawh chhuah hnu reilote 5min hnu lawkah chesualin, a chhunga chuang mi 242, Cabin Crew Pilots 2 leh Air Hostess 10 telin dam chhuak an awm beisei an ni lo (He thuziak lai hian). He Air India Flight AI171 9-ah hian Air-hostess Lamnunthem Singson (LS) chu a tel a, Reuters news chuan thlawhna tlakna hmun atangin ruang 204 an la chhuak tawh, a ti. Sky News chuan ruang 100 te chu Hospital-ah phurh thlen tawh an ni, a ti bawk. Theihtawp chhuahin ruang zawn hna thawh mek zel a ni.
He thlawhna tlaah hian Indians 169, British mi 53, Portugues 7 leh Canadian 1 an chuang a ni. Thlawhna tla hian BJ Medical College a Doctor zirlaite chenna building a suin a chungah a tla a, he building chung lamah hian thlawhna mawng lam chu bungbu vu in a awm, a thla te pawh a darh hneh viau. Thlawhna thlawk chhuak hi a hniam hle a, mi thenkhatin mobile phone atangin video in an lo la a, chu video chu a darh (viral) nasa. Nu pakhat chuan a fapain thlawhnain an awmna building a su dawn tih hriain, in chhawng 2na tukverh atangin a zuang chhuak a, a thi lo hlauh niin BBC palai a hrilh.
Boeing 789 Dreamliner hi khawvelin kum 2009 atangin a hmel hriat tan a, 1000 zet siam tawh niin, tun tum hi hetianga chhiatna rapthlak tak tawka a tlak (fatal crash) vawikhat a ni. Boeing Company chuan, a tul ang zelin Air India Flight chetsual chhuinaah tanpui an tum tih an puang. Pilots 2 ten an khalh a, hetiang thlawhna hi engine 2 nei chi niin, chutianga chesual mai tura ngaih a ni lova, engine 1 zawk hmang pawhin thui tak thlawk thei tura duan a ni. Black Box ah chiang zawkin, thlawhna chet sual chhan hi hriat theih a ni dawn a ni.
Boeing 787-8 Dreamliner te hi him tawk hlea ngaih a nih laiin, hetianga a chesual hian khawvel a barakhaih hle. Pilots 2 te pawh hian boruakah zin kualna thui tak leh flight experience an nei tha hle a sawi niin, boruakah darkar 10,000 zet an lo tualchaiin thlawk tawh a, hetianga an thlawh chhuah hnu 5min vel leka manganna thu thawn (Mayday distress call) an pe chhuak hi a chhan hriat a la ni lo.
Alastair Rosenschen, British Airways Pilot & Aviation Analyst chuan, thlawhna tlak hma lawka a thlawh dan leh thla (wings) parh vel dan a hmuhin, Sky News hnenah "Wheel a thlak dan leh a thla awm dan chu a dik hlel deuhva, a in vawrh sang chak tawk lovin a thlawk muang deuh" leh, a hma lamin van boruak hawia a in khawh chhoh dan chu a van hawi tawklo deuh niin a sawi. Helicopter Pilot Sewin Kolomafe pawhin Sky News hnenah, a thlawk hniam takin a thluak muang viau a ni, a ti.
Air India thlawhna hi Flight-radar24 data tarlan danin, dar 1:30 pm ah leiah a la awm a, dar 1:34 pm ah 11.5mph (18.5kmp) in a thlawk tan a, dar 1:38 pm ah 625 FT/190M ah awmin, a speed hi 174 Knot ah Signal a awm tawhlo, tih a ni. Air India flight hian a tum dawna gear (landing gear) a chhuak (gear out) chu Helicopter Pilot Kolomafe chuan, engvang nge tih hriat a ngai ang, a ti.
GS Malik, Ahmedabad Police Chief chuan, thi zingah, ruang hmuh chhuah zingah tualchhung mi an awm nual a rinawm, a ti. Medical College a doctor zirlai 50 zet chu Hospital ah an hliam vangin hruai an ni a, medical zirlai 5 chin hriat lohvin an awm bawk.
Breaking News: Indian-British mi, kum 20 zet Britain a awm tawh Vishwash Kumar Ramesh chu dam chhuak awm niin, NDTV leh Hindustan Times te sawi danin, Ramesh chuan ka unaupa Ajay nen kan chuang a, thutna erawh thuhmun lovah kan thu a. 30 second vel hnu awrh turah a puak ring tak awmin, thlawhna chu a tla thuai a, a thleng thut a ni, ka han harh chhuah chuan ka bulah ruang tam tak a lo awm a, ka awm leh ke leh mit ah hliam ka tuar, a ti.
(He thuziak lai hian ngawrh takin, chhanchhuah hna thawh mek reng a ni a, ruang hmuh zat te khi danglam thei reng a ni)-CT Lalrinawma
