Air India Flight No A1171, Boeing 787-8 Dreamliner chesual ah Ramesh Viswash Kumar (40) chu a damchhuak
Rauthla 13.06.2025 (Zirtawpni) : Air India flight No. AI171, Ahmedabad atanga London Gatwick Airport pan tur, Boeing 787-8 Dreamliner chu nimin June 12, 2025 chhun dar 1:38 khan a thlawh chhuah hnu mi-nute 5 velah a chesuala, passengers leh crew: 242 zingah vanneihthlak takin Ramesh Viswash Kumar kum 40, seat 11A a thu a dam chhuak.
Air India flight No. AI171 hi a chetsual hma lawkin Pilot hian May-day tichhuak mahse Air Traffic Control (ATC) lamin an chhang mai lo tih Directorate General of Civil Aviation chuan a sawi a. He chetsualna thlen hnu hian Ahmedabad airport chu khar nghal a ni a. Thlawh -na pilot hi captain Sumeet Sabharwal niin Line Training Captain anih bakah darkar 8200 zet lo thlawk tawh leh tawn hriat ngah tak a ni a, Co-pilot, first officer Clive Kundar pawh hi darkar 1100 zet lo thlawk tawh a ni bawk a ni, Thlawhna Boeing 787-8 Dreamliner a chuang zawng hi an vaiin mi 242 niin passenger 230 leh thlawhna a thawktu mi 12 an ni a, India mi - 169, British mi 53, Canadian 1, leh Portuguese mi 7 an ni.
Air India thlawhna chesual ta hian Ahmedabad-a Sardar Vallabhbhai Patel International Airport atanga km 5 vela hla, BJ Medical College hostel, Meghani Nagar hmun a mi chu a su a, hetih lai hian BJ Medical College, Meghani Nagar a MBBS zirlai te hian chhun chaw an fak lai mek a ni a, thlawhna hian BJ Med. College choka leh dinning hall su-in MBBS student mi 5 a hmunah an thi a, hliam 60 vel an awm. Air India passenger 241 leh lei lama thlawhna in a delh mi 49 nen thi zat hi mi 290 niin Reuters chuan a sawi.
Prime Minister Narendra Modi chuan Aviation Minister be nghalin a tul anga hmala turin a hrilh nghal a. Gujarat Chief Minister Bhupendra Patel pawhin vanduaina rapthlak tak thleng hian a barakhaih thu a sawi bawk. Union Aviation Minister Ram Mohan Naidu Kinjarapu leh Union Home Minister Amit Shah te chuan Ahmedabad an pan nghal a. Disaster Management lamin chetsualna hmunah hma an la nghal bawk a ni
Chief Minister Patel-a chuan thuneitute chu chhanchhuah leh chhawm dawl hna thawkna leh hliam tuar enkawlna kawngah a rang thei ang bera che chhuak turin a ti a. Hliam tuarte rang taka enkawl an nih theihna turin a phurhna tur kawng bik pawh ruahman niin damdawi inte pawh ngai pawimawh turin ka chah, a ti.
Air India neitu, Tata Group chuan a tuartu chhungte an tawrhpui thu an sawi a. “Tun dinhmunah chuan kan ngaih pawimawh ber chu a tuartu leh an chhungte ngaihven a ni a. Emergency response team pawh kan thawhpui a, a tul anga puih leh chhawmdawlna pawh ngaihtuahsak an ni ang,” tiin X-ah an tarlang.
Passenger 242 zingah vanneihthlak takin kum 40 a upa, Vishwa Kumar Ramesh, seat No. 11A a thu chu a dam chhuak a, a ni hi a unaupa Ajay Kumar Ramesh (45) nen Gujarat a an chhungte tlawha lo zin an ni.
British citizen an ni a, Ramesh a u Ajay Kumar Ramesh chu nunna chan zingah a tel. Ramesh hi Ahmedabad a Civil Hospital-ah enkawl mek a ni a, hliam a tuar ve nual a.
Ramesh sawi dan chuan “Ahmedabad Airport atanga an thlawh chhuah hnu second 30 awm velah thil puak ri dup ka hria a, kan tla thla nghal a ni deuh mai a, a rang lutuk, inrin hman ngaihna a awm lo,” a ti.
Vishwa Kumar Ramesh hian a awm (chest), a mit leh a ke-ah hliam a tuar. A sawi zel danin Ramesh chuan leia kan tlak thlen hnu a, nikhua ka hriatin, ka bul velah ruang a lo let phung a, hlauhna in ka khat a. Ka tho vat a, ka tlan vak a, tuin emaw, min pawm bet a, ambulance ah min dah lut a, damdawi In ah min dah ta a ni, a ti.
