Bana Kaih Scheme kaltlanga ran vulh lama hma lak tumte tan insurance kalpui dan tur ngaihtuah

Bana Kaih Scheme kaltlanga ran vulh lama hma lak tumte tan insurance kalpui dan tur ngaihtuah

Rauthla 16.06.2025 (Thawhtanni) : Vawiin chawhnu khan Planning & Programme Implementation Committe room-ah Bana Kaih Scheme kaltlanga ran vulh lama hma lak tumte tan insurance kalpui dan tur, 'Livestock Insurance for Progress Partner under Animal Husbandry & Veterinary Department' relin thutkhawm a ni a. Pu KC Lalmalsawmzauva, Vice Chairman, Mizoram State Policy Coordination Committee chuan he thutkhawm hi kaihruaiin MSPCC member-te, AH & Vety Department-a thawktute, SBI, MRB, Mizoram Co-operative Apex Bank, HDFC, National Insurance Company Limited, IFFCO Tokio General Insurance Limited leh Insurance company hrang hrang aiawhte an tel a ni.

      Hun kaihruaitu Pu KC Lalmalsawmzauva, Vice Chairman, MSPCC chuan Bana Kaih Scheme kaltlangin Animal Husbandry & Veterinary Department hnuaiah hmalakna kalpui tum mi thahnem tak an awm thu sawiin heng hmalaknate hi hmasawnna thlentu a nih theih nan awmze nei taka kalpui a tul thu a sawi a. Ran vulh lama hma la tur ten ran hri hrang hrang laka an rante an himna tura fimkhur zirtir a pawimawh thu a sawi a. Chutihrual chuan ran vulhtuten thlamuang taka hma an lak theih nan ran insurance tha taka kalpui a tul thu sawiin chumi tihlawhtling tur chuan kalkhawmte thahnemngaihna a pawimawh thu a sawi.

        National Insurance Company Limited-a thawktute tarlan danin NICL chuan Mizoramah kum 2022, May ni 24 khan MzSRLM leh Animal Husbandry & Veterinary Department nen insurance kalpui turin inremna thuthlung a lo siam tawh a. Kum thum chhungin ran insurance-na sum cheng nuai 67.8 a lo pe chhuak tawh a ni. Vawk Insurance kalpuina hi a tawp tawh avangin a tharthawh lehna turin hmalak mek a nih thu tarlan a ni a, hemi rual hian Lawi insurance kalpuina turin hmalak mek a nih thu sawi a ni bawk.

        Thutkhawmnaah hian Insurance company tam zawk tan chuan ran insurance chu thil thar a nih thu leh company eng emaw zah chuan insurance pe tur chuan Bank inthlunzawm pui an neih a tul thu an sawi. SBI General Insurance hnuaiah ran insurance kalpui turin hmalakna kalpui mek a nih thu tarlan niin AH&Vety Department thawktute nen thawh ho a tul tur thu tarlan a ni.

        Bana Kaih Scheme kaltlanga AH&Vety Department hnuaiah hmalak tum, mimal dilna 3641 a awm a. Chung zinga 2170 chu vawk vulh tum an ni a, 908 chu Ar vulh tum an ni a, 269 chu Bawng vulh tum an ni a, 201 chu Kel vulh tum an ni.