Editorial : Kan hruaitute tanrual na zarah thla khat hlawh a awm thei dawn
Lai Autonomous District Council a thawktute hlawh lak theih loh avangin nghawng nasa takin a nei a. Sorkar hnathawk mai ni lo, nitin kut hnathawktu thleng in nghawng a nei tih hairual a ni lova. Bazar ah pawh pawisa lengvak a tlem avangin, kawngsira chawhmeh zuarte pawhin inhralh a harsat thu an sawi a ni. He hi ngun leh zuala ram mipuite hian ngaihtuahna kan sen a tul hle a. Ram hmangaihtu nia kan hriat kan thlan chhuah te hi sum leh pai ah chuan harsatna an nei lo tih a chiang reng mai a. Thawktute’n hlawh an lak theih loh dan tur pawh hre vek si a, hetianga ram mipuite ngaihtuah miah lova, an dawhkan ringawt an ngaihtuah hi a pawi hle a ni. Kan ram hian hmangaihtu dik tak a mamawh tawh tih hi ram mipuite hian hemi atang hian i zir chhuak hram hram ang u.
Thawktute’n hlawh an lak theihna turin kan politician thenkhatte’n theihtawp an chhuah a, hmingthat lak tum a Social Media hrang hrang ah party mite’n an hotute an fa chiam pawh hi sim a tha hle awm e. Thawktute’n hlawh an lak theihna tur hian kan MLA te pahnih an tangkai hle mai a. Tin, District Council ah MDC te pawhin theihtawp an chhuah a, kan CEM pawh in theihtawp a chhuah bawk a. Heng zawng zawng hi tanrualna avang chauh zawk a lo hlawhtling a ni. Hmingthat lak tum a Politics khelhna atan lo hman fo thin hi chin loh atan a tha hle ang.
June Ni 10 ah LADC sorkar awm dan tur a chiang thei turah ram mipuite’n kan beisei a. Tunah thla khat hlawh Mizoram sorkar sum kan puk dawn a ni a. June Ni 10 ah pawh thu lawmawm kan la hmu lo anih ngat chuan engtin nge kan awm zel dawn tih pawh hriat a har ta. Loan la tu te an khawngaih thlak em em mai bawk a. Voters te ngaihtuah lo va, mahni dawhkan humhim tum tlatna hi kan ram hian a that phah in kan ring em? Hmangaihtu kan ram hian a mamawh ta e.
