ZPM sorkarin Mizoram kawngpui ICU-ah an dah. Lirthei ke hnih nei khalhtute tan thang an kam..."
- Ngurdingpuia Pachuau, Senior Vice President, MPYCC
Rauthla 05.06.2025 (Ningani) : Vawiin ni 5.6.2025 (Ningani) hian Congress Thalai chuan Chanmari leh Bawngkawn inkar kawng PWD in Bituminous Concrete (BC) hmanga a thawmthat hna an thawh mek an tlawh a. Pu Ngurdingpuia Pachuau, Senior Vice President MPYCC chuan kawng chhia avanga rei tak harsatna tawk tawh Chhim lama kan unaute kawng ATL road siamna tur pawt peng a, kawng tha sa zawh hrehawm khawpa a siam chu a thlangtu mipui pawisak lohna lian tak a ni. ZPM sorkar hian, "Eizawnna atana hmang leh lirthei ke hnih nei khalhtute tan thang an kam a ni," a ti.
Pu Ngurdingpuia Pachuau chuan, kawng chhe siam tura a hawnna tun hma zawng zawnga la tih ngai loh Traffic ti Jam khawpa ribbon chep chat meuhin PWD Minister-in a hawng a. Kawng chhe siam tha tura hmalatuten kawng tha sa an ti chhe vek a. Lirthei ke hnih nei chi phei chu an tlu nasa a, hliam tuar leh lirthei chhiat phah pawh an awm nual tawh a ni. ZPM sorkar hian Mizoram inkalpawhna kawngpuite ICU-ah an dah mek a, kawng chhia an siam tha lova, kawng tha sa an ti chhe zo zawk a ni, a ti.
Zuangtuiah mipui hriselna atana tha lo Hot mix plant mipui thinrimin an tih chhiat chungchang sawiin Pu Ngurdingpuia chuan, PWD Minister Pu Vanlalhlana'n khawl tihchhiat avanga kawng siam hnathawh chhunzawm a harsat thu a sawi chu thil zahthlak a ni. Hetiang khawl awm hma pawhin kum tam tak kawng hi nasa taka siam a ni tawh a. He an khawl chhia hi kawng siam chungchangah chhuanlam a tling lo a ni. He khawl hmanga an kawng siam, an inzawrhna anga kum 15 daih tura an sawiin fur khat pawh a daih lova. Hei hian a sawi a sawi aia a thawha thawk thiam leh thei sorkar Mizoramin a mamawh zia a tichiang a. PWD Minister Pu Vanlalhlana'n ZPM chhung inkhawmah kawng chhia chu mipuiin ka tih chhiat emaw an ti tia mipui a dem chu mahni chanvo hre lo anihzia a pholang a, midang kuta a chanvo (PWD Minister) a nihna hi hlan ngam zawk turin kan ngen a ni, a ti.
PWD Minister Pu Vanlalhlana hova meeting-in Aizawl khawpui chhung kawng thawmthat hna hi thuang hniha kalpui tur niin, Aizawl Road North Division Km 44-a thui leh Aizawl Road South Division hnuaia km 40 a thui thawmthat hnathawh mek leh thawh tum mek Thuampui leh Selesih kawng bik Rigid pavement-a siam that tum pawh chhim lam kawng siamna tur dik lo taka pawh pen sak hi dik leh tha taka hmang turin kan ngen a. Tute emaw sum siamna atana hman a nih leh nih loh hi Congress thalai chuan uluk takin a en zuiin a vil zui zel dawn a ni, a ti bawk.
Chammari to Bawngkawn (Ramhlun Road) kawng chhe tlawhnaah hian Pu Lalsanglura Sailo, Vice President MPYCC leh MPYCC hruaitu (Office Bearer's) rual mi engemaw zat an tel a ni.
