Mizoram Tipper Association hruaituten kawngpui siam hnatlangpui neih an tum thu an puang.
Rauthla 23.06.2025 (Thawhtanni) : Mizoram Tipper Association (MTA), Kolasib District Hqrs hruaitute chuan vawiin khan Kolasib MJA Press Club ah Press Conference neiin, tunkar ningani (26/6/2026) zing dar 6 atangin NH-06 & 306, Kawnpui leh Sairang inkar ah Kawngpui chhia siam that hnatlangpui neih an tum thu an puang.
MTA, Kolasib District Hqrs hruaitute chuan tun thla June ni 4, 2025 khan Mizoram Tipper Association (Drivers & Owners) Dist. Hqrs. Kolasib te'n kan châk lâkna kawngpui NH-06 & 306 (Kawnpui to Sairang) hi a chhiat tawh avanga Kolasib DC hnenah rawtna an thlen tawh chu bawhzui in ni 19.06.2025 khan MTA hruaitute kaihhruaina in Kolasib leh Sairang inkar kawngpuia Mizoram PWD & NHIDCL te hnathawh dan a hmunah an enfiah tih an sawi a. An hnathawh hi a chak lovin an thawk muang hle tiin, MTA Kolasib District Hqrs hruaitute chuan Mizoram châk lâk luhna Kawngpui ber chu lirthei tana zawh hlauhawm leh chhiatna nasa zawk thleng thei dinhmunah a awm mek a, tunah pawh lirthei khalhtute leh neituten harsatna namen lo an tawk mek tih an sawi.
Hetiang a ni chunga rit phur chunga he Kawng zawh luih hian Motor chhiatna leh Oil manah sum sen a tam phah a, hei hian Motor hman man a ti sang thin a, a tuartu chu mipuite kan ni, an ti.
Hetiang hi thil awmdan anih avangin tunkar ningani, ni 26.06.2025 atangin Kawnpui leh Sairang inkar Kawngpui hi Mizoram Tipper Association, Kolasib District Hqrs bul tum in hnatlanga Kawng siam hnatlangpui neih nise tiin an rel a. Kawng chhe zual lai te hi lirthei vei vak ten lungmuang taka an zawh theihna tura hnawh a nih hma chuan hemi ni atang hian tiam chin awm lovin lirthei eng chi mah in he Kawng hi zawh lo turin an ngen a. Zawh lui an awm anih chuan an chungah harsatna engpawh thleng se MTA chuan mawh a phur lovang, an ti.
Ni 26.06.2025 a HNATLANG PUI an neihna turah hian lirthei a ei zawng Association hrang hrang te hnatlanga thawkchhuak vek turin MTA, Kolasib District Hqrs chuan an sawm a ni
MTA hruaituten an sawi dan in Kawng siam hnatlangpui an neih tur hi Mizoram Truck Owners Assn. Hqrs., Aizawl; Mizoram Truck Drivers Assn. Hqrs., Aizawl; Mizoram Oil Tanker Drivers Assn., Aizawl; Mizoram Indane Drivers Assn., Aizawl; Kolasib District Vehicle Owners & Drivers Assn JAC leh lirthei enkawltu pawl thenkhatin an thlawp thu an sawi a. Harsatna dang a thlen loh nan Kawng siam hnatlang pui an neih ni hian phai lam atangin nitin lirthei lian an rawn tlan luh loh nan Silchar Truck Drivers Assn hruaitute hnenah ngenna an thlen tawh thu an sawi bawk.
Kawng siam hnatlanga hman turin MTA, Kolasib District Hqrs chuan Lung (boulder) a theih ang ang an tum dawn a, anni bakah hian Kolasib leh Kawnpui a Lung Quarry neitute leh mi in phal leh thahnem ngaiten sum leh an mamawh dangte an pek dawn thu an sawi bawk.
MTA hruaitute chuan mipuite tana harsatna siam chu an duh ber anih loh thu sawi in, tuna hmalak an tumna chu loh theih loh leh tul ni a an hriat avanga kalpui tum annih thu an sawi a, harsatna thleng thei lakah mipuite hriatthiamna an ngen lawk tih an sawi bawk.
