Union Budget 2026-2027 chu pharh fel ani ta
Rauthla 02.Feb.2026 (Thawhtanni) : Union Finance minister Nirmala Shitharaman chuan nimin khan a zawna a vawi kua budget pharhna turin kum 2026-27 Union Budget a pharh. Nimina budget pharh hi India independent hnua Pathiannia Union Budget pharh a nih hmasakna ber a ni a; Nimin vek khan 16th Fianance Commission chu pharh nghal niin kumin April 1 ațanga hmang tanin kum nga chhung atana ruahman a ni bawk.
Sitharaman chuan budget-ah hian thil pathum -economy lama hmasawnna tam zawk leh ngelnghet, mipuite beiseina tihhlawhltin leh khawi bial leh hnam tin tana remchanna tha siamsak ah a innghat tih a sawi.
Financial year 2027 atana total expenditure tura ruahman hi Rs vbc nuai 53.5 niin, capital expenditure-ah Rs vbc nuai 12.2 ruahman a ni. Net market borrowing-ah Rs vbc nuai 11.7, gross market borrowing-ah Rs vbc nuai 17.2 niin, chhiah atanga sum hmuh tur hi Rs vbc nuai 28.7 a ni. Sum indaih lohna, fiscal deficit target hi GDP atanga 4.3% ni tura chhut a ni bawk.
16th Finance Commission pharhah hian kum 2026-31 chhunga sorkar laipui leh state sorkara chhiah insem dan turte tarlan a ni a, Uion Cabinet chuan 16th FC pharh tur hi kum 2024 November 29 khan an lo pawmpui tawh a ni. Sitharaman chuan nimin budget pharhah hian sorkar chuan tawngka chauha hmasaawnna ni loin ataka insiam thatna kawng a thlang zawk tih budget pharhna neihah hian a sawi.
April 1 ațangin Income Tax Act, 2025 hmang dawn
Income tax Act hman mek chu April 1 atangin "Income Tax Act, 2025 in thlak a ni dawn. Income Tax dan thar hi uluk taka zirchian a nih hnuah a form pawh siamthat niin, dan thar hi mipui nawlpui tan pawha hriatthiam awlsam zawk tura duan a nih tih budget phartu, Finane Minister chuan a sawi. Income tax rules siamthat leh form chungchang hian sorkar chuan hriattirna a tichhuak dawn dawn tih a tarlang bawk.
Ram thenawm puihna titlem
Budget tharah hian India-in a thenawm ramte hnena chhawmdaawlna a pek thin hrang hrang a siam rem a; kum 2026-27 chhung atana Bangladesh a puihna a pek thin chu a chanve-ah a tihhniam sak a, Iran-a Chabahar port siamna atana puihna a pek thin pawh a dah tawh rih lo bawk. Afghanistan puihna pawh tihdanglam lohin a ngai, Rs vbc 150 dah leh niin Myanmar puihna pawh 14% a tihniamin Rs vbc 300 chauh a ruahman sak tawh thung.
"Aid to Countries" ațanga puihna pek thin chu 4% in kum hmasa aia tihsan a ni a, Bhutan erawh ram thenawm zinga India puihna dawng tam ber an ni dawn a, puihna pek thin chu 6% a tihsan niin Rs vbc 2,289 ruahman a ni. Nepal puihna pawh 14% a tihpun niin Rs vbc 800 dah niin Sri Lanka tan hian Rs vbc 400 a ruahman leh bawk. India-in thenawm ramte puihna adah hian 'Neighbourhood-first approach' kaltlanga duan niin kum 2026-27 chhung MEA sum sen tur hi Rs vbc 22,119 bawrah dah a ni bawk.
Mineral-rich state puihna pe dawn
Sitharaman chuan ram chhunga leilung hausakna hrang hrang thar chhuah tihpun a nih theihna turin ram chhunga mineral lama hausa state hrang hrang Odisha, Kerala, Andhra Pradesh, leh Tamil Nadu-te chu rare-earth lam thar chhuahna hmunatana puih an nih tur thu a sawi. Hemi kaltlang hian India thar chhuah chu nasa zawka tihpun tum a ni.
He hmalakna hi India-in China laka rare-earth mineral mamawh a chawk luh thin a tihtlem theihna tura duan a ni a, rare earth pual hian kum 2025 khan scheme duan tawh niin tunah hian heng state rare-earth tamnate pui thei tur hi duan a nih leh thu finance minister hian a tarlang.
