Aizawl District a HIV+ve kai zing ah Kum 25-35 an tam ber 40.4% an ni

 AIZAWL DISTRICT DAPCC (DISTRICT AIDS PREVENTION AND CONTROL COMMITTEE) THU KHAWM

Rauthla 19.06. 2025 (Ningani): Vawiin khan District AIDS Prevention and Control Committee(DAPCC), Aizawl district chuan DC conference Hall-ah, District bawrhsap leh DAPCC chairman ni bawk Er.Lalhriatpuia IAS kaihruaina hnuaia meeting an nei .

    Meeting khuhhawnna thu sawiin DAPCC Chairman chuan HIV+ hrik kai thar Mizoramah, a bik takin Aizawl district-ah an pung nasa a. Thalai zingah ruihhlo ngawlvei an tam si, kan sex ratio lah a sang tulh tulh mai bawk si a. Hetianga kan kal zel chuan tun atanga hun reilo te-ah chuan kan mizo nula ten mizo tlangval pasal tur an hmuzawh loh hun kan thleng palh a hlauawm hle a ni. Ruihhlo ngawlveina leh mipat-hmeichhiat hmankhawhlohna hi thuk taka inkungkaih tlat a ni a. Chu chu HIV+ hrik kai pun hluaina chhan pui ber a nih avangin, engtin nge HIV+ hri darh zel tur hi kan ven ang tih hi bengsikin i ngaihtuah tlang te ang u, tiin DAPCC member kalkhawm te a sawm.

        Vawiin meeting-ah hian Intensified IEC (Information, Education & Communication) hnuaia kum 2024-2025 chhunga hmalakna hrang hrang te thlirho a, chipchiar tak leh huangzau taka sawi ho a ni hnuah,DAPCC member kalkhawm te atangin rawtna hrang hrang leh hmalak zel dan tur rawtna hrang hrang te ngaihthlak a ni.

        Dr.R.Zonunmawii, DPM, DISHA atangin Power Point Presentation hmangin “HIV Prevalence and incidence in Aizawl District” tih thupui hmangin HIV chungchanga Aizawl district dinhmun zirtirna ngaihthlak a ni a. India ram pumpuia HIV+ vei 0.20% an awm laiin, Mizoramah 2.73% an awm a, Aizawl district chhungah 3.93% an awm mek a ni. Aizawl district-a Kum 7 (2018-2025) chhunga thisen( general) 1,27,429 test atangin HIV+ hri pai mi 9600 hmuhchhuah a ni a. Nu naupai thisen 62,124 test atangin HIV+ hri pai mi 635 hmuchhuah an awm bawk.

         Kum 7 chhunga HIV+ hri pai hmuhchhuah ten HIV+ an kaina chu: Heterosexual atangin 64.1%, Homosexual/Bisexual atangin 3.2%, Hriau inhmantawm atangin 30.4%, Nu leh Pa atangin 1.5% leh kaina hriat loh( not specified) 0.6% te an ni.

Age wise HIV+ kai dan:

1) kum (14) hnuailam---1.57% ( 2023-2024 aiin 2024-2025 ah 0.3% in a pung)

2) kum (15-24) inkar----20.2% (2023-2024 aiin 2024-2025 ah 3.8% in a pung)

3) kum (25-35) inkar-----40.4%

4) kum (35-49) inkar-----29.8%

5) kum (50) chunglam---7.8% (kum 2023-2024 aiin kum 2024-2025-ah 0.6% in a pung)

        Aizawl district chhungah hian Integrated Counseling and testing Centre(ICTC) 13 awmin, chung ICTC 13-ah chuan April,2024-March,2025 chhung khan Thisen( general) 33,285 test in HIV+ hri pai mi 1135 an hmuchhuak a. Nu naupai thisen 8475 an test atangin HIV+ 61 pai an hmuchhuak bawk.

        Aizawl district-ah ARTC 4 awm in, ART la 10,215 an awm mek a. HIV+ leh TB hrik pai kawp 142 ten ART an la mek bawk. Designated STI/RTI (Sexually Transmitted Infection/ Reproductive Tract Infection) Clinics (DSRC) 3 awmin, mi 5033 an en-ah STI/RTI vei mi 988 hmuchhuah niin, enkawl dam an ni. Syphilis hri pai leh pai loh mi 5033(general) screen-ah, mi 366 ten an pai tih hmuchhuah a ni a, enkawl dam an ni bawk. 5622 (Nu naupai) screen-ah 114 hmuchhuah niin, 112 enkawl dam an ni bawk.

        Aizawl district-ah hian HIV+ hrik pai theih dinhmuna ding {High Risk Group (HRG)} te enkawlna Targetted Intervention (TI) 14 a awm a. Kum 2024-2025 chhung hian Injecting Drug Users (IDUs) thisen 5877 test-ah 66 HIV+ hri pai hmuchhuah a ni a. Female Sex Workers (FSMs) thisen 500 test-ah 12 hmuchhuah niin, Men having sex with Men (MSM) thisen 8480 test-ah 90 HIV+ hmuchhuah a ni bawk. HIV+ hri pai hmuchhuah zawng zawng a 92% hi general community atang niin, HRG IT atanga hmuchhuah hi 7.9% chauh a nit hung.

        Vawiin meeting-ah hian zirlai naupang class VIII,IX leh XI te zingah HIV/AIDS leh STI/RTI Awareness campaign chi khat atan Red Ribbon School Quiz Competition,2025 buatsaih a ni dawn a. School level, District Level, State Level, Regional Level leh National Level thlengin competition hi buatsaihin, an inel chho zel dawn a ni. District Level Competition hi DAPCU/DEO ten an buatsaih dawn a. Lawmman atan 1st Prize-₹7000, 2nd Prize-₹5000, 3rd Prize-₹4000 leh Consolation Prize-₹1000 a awm dawn a ni. District Level-a ti tha ten State level-ah an inel anga, State level-a ti tha ten Regional Level-ah, Regional level-a ti tha ten National level-ah 12th January, 2026 khian an inel leh dawn a ni.