𝗜𝗦𝗥𝗔𝗘𝗟 - 𝗜𝗥𝗔𝗡 𝗜𝗡𝗗𝗢𝗡𝗔𝗔𝗛 𝗔𝗠𝗘𝗥𝗜𝗖𝗔 𝗜𝗡𝗥𝗔𝗪𝗟𝗛 𝗔 𝗛𝗡𝗔𝗜 𝗧𝗜𝗔𝗟 𝗧𝗜𝗔𝗟
(𝙶𝚎𝚗𝚎𝚟𝚊-𝚊𝚑 𝚟𝚊𝚠𝚒𝚒𝚗𝚊𝚑 𝚛𝚎𝚖𝚗𝚊 𝚊𝚗 𝚣𝚊𝚠𝚗𝚐, 𝙸𝚜𝚛𝚊𝚎𝚕 𝚏𝚊 𝚝𝚎 𝙸𝚗𝚍𝚒𝚊 𝚕𝚊𝚖𝚊𝚑...)
𝓟𝓱𝓾𝓪𝓱𝓴𝓱𝓪𝔀𝓶𝓽𝓾:
~ Zoa Tlau (20.6.2025) zing dar 7:30
Buannel Cabin
𝐖𝐡𝐢𝐭𝐞 𝐇𝐨𝐮𝐬𝐞 𝐬𝐭𝐚𝐭𝐞𝐦𝐞𝐧𝐭:
Nizan lama White House press secretary Karoline Leavitt-in White House statement-a a sawi dan chuan US President Donald Trump chuan kar hnih chhungin Israel-Iran indonaa a tel ve dawn leh dawn loh a tichiang ang.
Republican senator Lindsey Gordon chuan Trump chu thapui thawha inrawlha Iran Fordow nuclear hmun central Iran-a lei hnuai thuk tak ami kap chhe turin a nawr na hle.
𝐈𝐬𝐫𝐚𝐞𝐥-𝐢𝐧 𝐢𝐧𝐝𝐨𝐧𝐚𝐚 𝐔𝐒 𝐭𝐞𝐥 𝐯𝐞 ṭ𝐡𝐚 𝐭𝐢:
Nizan lama US White House statement siam hma khan Israel official te chuan Israel-Iran indonaa US a tel ve chuan kar hnih nghah ngai lovin ni rei lo te chhungin buaina chinfel a nih theih thu an sawi.
Israel official te chuan Iran nuclear siamna hmun, bunker thûk tak Fordow tichhe turin US siam bunker-busting bombs mamawh a nih thu an sawi. "US an inrawlh chuan kan lawm viau ang a, an inrawlh loh pawhin kan mission hi kan puitlin tho ang," an ti.
𝗔𝗺𝗲𝗿𝗶𝗰𝗮 𝗶𝗻𝗱𝗼𝗻𝗮 𝗮 𝗻𝗶 𝗹𝗼:
Iran Finance Minister chuan Israel leh Iran indonaa US-in a ring a rawlh vaih chuan Middle East chu hremhmun anga sâ a ni ang, tiin Donald Trump chu inrawlh lo turin a vau lawk a.
Iran FM Saeed Khatibzadeh chuan, "Hei hi America indona a ni lo a, Trump hi a inrawlh anih chuan mahni indona ni lova President inrawlh zuk zuk tiin an hre reng tawh ang," a ti a ni.
𝗥𝘂𝘀𝘀𝗶𝗮 & 𝗖𝗵𝗶𝗻𝗮:
US, Russian President Vladimir Putin chuan Iran Supreme Leader Khamenei thah tum chungchang zawhna chhangin sawi pawh a sawi duh loh thu sawiin, "An thah hi ka duh hlawl lo," a ti. Russia leh Iran hi ralthuamah pawh thuthlung nghet tak nei an ni a. Russia President leh China leader Xi Jiping te hian inremna a awm thuai an duh a, US eptu ve ve an nih angin an inthurual viau a, Iran puih pawh an hreh lo ve ve.
𝗥𝗮𝗺 𝗽𝗮𝗵𝗻𝗶𝗵 𝘁𝗵𝗶𝗻𝘂𝗿𝗻𝗮:
Beershaba, Israel chhim lama sipai hospital, Soroka hospital chu Iran-in a bomb avangin hliam an tam hle a. He thil thleng avanga Israel thinurna hi a sosang hle a ni. Iran internal security headquarters, Tehran-a awm chu Israel hian an bomb zui a. Jerusalem leh Tel Aviv nasa takin Iran hian a bomb a, Israel fa te chenna in nei lo an ṭhahnem tawh hle.
𝗜𝗿𝗮𝗻 𝗙𝗠 𝗚𝗲𝗻𝗲𝘃𝗮-𝗮𝗵:
Vawiin hian Iran Foreign Minister chu Geneva-ah a kal a, France, Germany leh Britain Foreign Minister te nen 'nuclear talk' an nei ang a, Israel nena an inbeihna tihtawp dan tur an sawi ang. Israel leh Iran inremna tur hi vawiina Geneva-a inbiakna hian a thlen ngei an beisei.
Tel tura beisei te chu :-
1. Iranian Foreign Minister Abbas Araghchi
2. British Foreign Secretary David Lammy
3. French Foreign Minister Jean-Noel Barrot
4. German Foreign Minister Johann Wadephul
5. European Union foreign policy chief Kaja Kallas
𝗜𝘀𝗿𝗮𝗲𝗹 𝗳𝗮𝘁𝗲 𝗜𝗻𝗱𝗶𝗮 𝗹𝗮𝗺𝗮𝗵:
Indona tuartu ten Israel an chhuahsan nasa hle a, hetiang bawk hian Iran chhuahsantu an pung, anni hi Pakistan leh Turkey chuan an dang tlat thung. Israel fate hian India an pan nasa hle a, hei hi thil mak erawh a ni lo.
Israel leh India hi ṭhian hlun an ni a, tuna an tlanchhe mêka hi India hian a hlawkpui dawn nia hmuh a ni bawk. "Human migration mai a ni lo a, intellectual migration a ni," tiin mithiam te chuan mi thluak ṭha tak tak India-in a neih phah dawn an ti.
India hi Asia chhak lama Indopui 2-na zawh hnua Israel independent pawmtu hmasa ber ram a ni a. Kum tam tak, sang bi liam tawh aṭang khan ram pahnih hi inkawmngeihin insumdawntawn ṭhinin, kum 1992 khan ram pahnih thuthlung nghet 'official' in an nei.
India hian tun buai denchhen hian Israel fate tan Visa awlsam bîk a ruahman sak nghal a. India chhim lam; Goa, Kerala, Maharashtra, Tamil Nadu etc. te chu Juda mi tamna leh an Pathian biakna hmun tamna a ni a. Raltlan ang pawhin an inngai lo a, chawl hahdamah Juda mite hi an inngai niin an sawi.
India hi khawvel economy ṭhang chak ber a ni chho mêk a, AI leh IT lamah a ṭhang chak em em a, Juda mi thluak ṭha lutuk te rawn tlanchhe mêk hi khawvelin a hmuh dan chuan India ram ropuina tizualtu tur a ni, an ti. Juda tan lah India chu an thawhlehnaah an ngai.
(𝘚𝘰𝘶𝘳𝘤𝘦 𝘩𝘳𝘢𝘯𝘨 𝘩𝘳𝘢𝘯𝘨 𝘭𝘢𝘬𝘬𝘩𝘢𝘸𝘮 𝘢 𝘯𝘪 𝘢, 𝘈𝘭 𝘑𝘢𝘻𝘦𝘦𝘳𝘢 𝘣𝘪𝘬𝘢 𝘩𝘪 𝘤𝘩𝘶 𝘐𝘴𝘳𝘢𝘦𝘭 𝘭𝘦𝘩 𝘞𝘦𝘴𝘵 𝘉𝘢𝘯𝘬-𝘢𝘩 𝘢𝘸𝘮 𝘢𝘯 𝘱𝘩𝘢𝘭 𝘵𝘢𝘸𝘩 𝘭𝘰 𝘢, 𝘑𝘰𝘳𝘥𝘰𝘯 𝘢ṭ𝘢𝘯𝘨𝘪𝘯 𝘢𝘯 𝘳𝘦𝘱𝘰𝘳𝘵)
