Cheng nuai 50 senga sak Central YLA Office Building chu Pu C.Ngunlianchunga, Lawngtlai West Bialtu MLA in a hawng
Rauthla 10.06.2025 (Thawhlehni) : Vawiin Ni 10.6.2025 (Thawhlehni) hian Lawngtlai West Bialtu MLA Pu C.Ngunlianchunga chuan Central YLA Office cheng nuai 50 senga sak chu a hawng.
Hawnna inkhawm hi Pu F.Lalrothanga, Central YLA President in a kaihruai a. Rev Dr.LH.Lalpekhlua, General Secretary LIKBK in Hunserh hmangin, thawhhona khawvel ah kan awm tawh tih hria a, Laifate hi hnam tlemte kan ni a, kan tanrual thiam phawt chuan Pathian malsawmna hi kan dawng zel ang, tiin Pathian hnenah Office thar hlanna tawngtai a nei.
Khuallian Pu C.Ngunlianchunga chuan, Pathianin hnam ah min din a, chenna tur ram min pe a, chu ramah chuan tlawmngai pawl lian tak mai YLA kan nei hi a lawmawm hle a. Kan innghahna lungphum pawimawh tak mai hi hre reng ila. Ram leh hnam humhalh kawng ah te, mi harsa leh chanhai zawk te tana nu leh pa nihna hi kalsan lova, kan kalpui zel hi a pawimawh dawn ani, a ti a. He ram leh hnam hmasawnna atan hian lungrual taka ke kan pen zel hi a ngai a, chumi tur chuan YLA hian hma i hruai ang u, a ti.
Pu C.Ngunlianchunga chuan Central YLA chu pawl thianghlim leh mi zawng zawng huap lo ni zel se. He pawl hi a zahawm a, a thianghlim a, politics in a tih bawlhhlawh loh nih tum tlat ila, midangte kaihbu ah tang mai lova, tan kan lak zel a ngai ani, a ti a. Kan khawtlang hi Sualna hi nasa takin min chim mek zel a. Ruihhlo in nasa takin min tibuai a, a dona kawng ah hian YLA ang chauh ni lo, a hnam anga kan do let hi a tul tawh tak zet ani, a ti a. Ruihhlo hian chhungkua min tibuai hle mai. Ruihhlo lakah kan fa, kan naute, kan chhungkua hi a him em tih hi ngaihtuah fo ila. Mahni hmasialna, kuttling lova hausak duhna nasa takin a awm ta. Ram Hruaitu te chauh hian piantharna hi kan mamawh ani lova, ram mipui hian thlaraua pianthar kan ngai ani, a ti bawk.
LADC kan nei a, ram leh hnam hmasawnna turin hna kan thawh a ngai a. Tuna kan dinhmun thlir hi chuan kan hlawh ringawt pawh 95% dawn a kal tawh a ni a. Kan revenue collection pawh a tam chho zel a, hei hi thil tangkai ah kan hman a ngai a, tunah chuan kan duh duh leina atan kan hmang emaw tih mai theih tur ani ta. He kan ram, Lairam hi awmna tlak a kan siam theihna tur chuan mahni hmasial lova, rinawmna leh dikna te a lo nun leh theihna turin theihtawp kan chhuah a ngai ani, a ti bawk.
District Council in Land Revenue ah Lairam chhungah a cheng leh khawsa lo in ram a neih theih loh tih ani a. Mahse, hei hi ngaihven a ni ta lo, hei kan dan hi ngaihven a, kan ngaihtuah a ngai hle awm e. Kan ram hi sumdawnna kan hmang mek a, kan ram kan vei loh a kan ram a ral chuan kan hman pawh hi a ral ngei ang. Kan ram hi thlir mai mai lova, kan ven a, kan ngaihven a ngai ta. Chuti anih loh chuan hnam dang ten kan ram hi an luahkhat vek a ngai ani, a ti. Lairam hi kan humhalh loh chuan kan ral mai dawn. Chumi tur chuan nang leh kei hi kan pawimawh hle a, kan tu leh fate tan awmna tlak ah kan siam theihna turin keimahni awmna zawnah theuh theihtawp chhuahin i humhalh tlat ang u, tiin kalkhawm te a sawm bawk ani.
Pu C.Ngunlianchunga hian Central YLA hnuaia ruihhlo dotu Drug Reduction Squad hnenah ruihhlo dona a tangkai taka an hman atan Rs 20,000/- a hlan bawk ani.
