EMMY AWARDS DAWNGTU BBC TEAM ZINGAH MIZO JOURNALIST PAHNIH TEL
Rauthla 27.06, 2025 (Zirtawpni) : Khawvela Journalism chawimawina ropui, June 26, 2025-a semchhuah Emmy Awards dawngtu team zinga Mizo pa hming pahnih a tel.
Emmy Awards Palladium Times Square, New York City atanga sem chhuah Emmy Awards-ah hian, 'Myanmar’s Civil War' tih thupui hmanga BBC in an buatsaih short-form documentary hian National Academy of Television Arts & Sciences (NATAS)-in News & Documentary Emmy Awards, vawi 46-na a buatsaihah Outstanding Continuing News Coverage – Short Form category-ah award an dawng. Myanmar to Maui, 2025 Emmys recognise global journalism frontlines... an ti hial!
BBC team-a Mizo hming lang pahnih hi Mizo journalist - HC Vanlalruata leh Isaac Zoramsanga te an ni.
Mizo journalist pahnihte hi BBC tana project-ah hian field producer hna an thawk a, Myanmar chhim lam Chin State-a ni 10 chhung reporting mission an neih chhungin, ground-level support pawimawh tak tak an thawk a. An hnathawh hian BBC team-in hmun ril leh thuk zawk, hnam sipai leh Myanmar sipai junta-te inkahna hmunte, hnam sipai inbunna hmunte an luhchilh theih phah a ni.
Minute 6.5-a rei documentary hian tualchhung hnam sipai pawlte'n hmun eng emaw zat atanga sipaite an hnawhchhuah dan a entir a. Chutih rualin, junta-in hnam sipai pawl tihtawp leh thalaite ralthuam hmanga an tihduhdahna, rukbo leh thah chungchanga report lungchhiatthlak tak takte pawh a pholang bawk.
