Rauthla 24.June.2025 (Thawhlehni) : Vawiin khan Pu Lalbiakzama, Speaker chuan Sihfa GSA buatsaih Local Football Tournament-ah khuallian niin a hawng a, tournament hlawhtling leh hlimawm tak hmang turin duhsakna a hlan.
Pu Lalbiakzama chuan, “Sihfa khua kan lo hriat thin dan hi a duhawm lam ve ve a ni a; ‘Kohhran lalna khua leh khaw taima’ tih hi kan lo hmelhriat dan a ni. Infiamna lamah pawh in lo duai lo hle mai. District First Division Club in nei thei te hi a ropui riau a. League sanga Major Games team neih hian sum a heh em em a, khaw lian leh hausa zawk tam takin an zuam loh a ni. Chutiang ngaihtuah chuan khaw pum tanrualna tel lo chuan he league hi khelh theih a ni lo a, khaw tangrual in nihna in lantir hi a ropuina lai tak a ni. Keini pawhin kan theihtawp kan lo chhuah ve a, Khawtlang hruaitute leh party lam te nen inrawn chungin kan sawi tlang zel dawn nia,” a ti.
Pu Zamtea chuan, “League sang hi amahin a awm ngawt thei lo a, a chawmtu player chher chhuah reng a ngai a, chutiang tura local tournament in siam thei hi in fakawm khawp mai. Hetah pawh hian mikhual tam tak dawl a ngaih avangin khaw tanrualna bawk a ngai a, chutiang thlenga in inhuamna hi chhinchhiah tlak a ni,” a ti a. “Infiamna hian tlakranna ni lovin, rilru leh taksa hriselna te, inthian thatna leh hmasawnna a thlen tur a ni a. A tum goal thleng zo si lo hian huau huauah kan thamral mai ang tih a hlauhawm hle; a hlawhtlinna tak tak hmun hruai thleng tur chuan GSA hruaitute pawhin tan la zel u la. Player-te pawhin tumruhna leh chhelna nen a tha ber nih tum a, eizawnna atana nei khawpin bei zel ang che u,” a ti bawk.
He tournament hi June ni 24-27, 2025 chhung neih tur a ni a. Khaw hrang hrang Sihfa, Tualbung, N. Lungpher leh Buhban atangin team pakua an tel a ni.
