MADC CEM Pu M Laikaw in Siaha-a Media workshop buatsaih a hmanpui
Rauthla 27.June.2025 (Zirtpawni) : District Information & Public Relations Office, Siaha leh Mizoram Journalists Association (MJA) Siaha tangkawp buatsaih Media Workshop chu vawiin khan IPRO Conference Hall, Council Vaih, Siaha-ah hman a ni a, Mara Autonomous District Council (MADC) Chief Executive Member (CEM) Pu M Laikaw chuan Khuallian niin he hun hi a hmanpui.
CEM Pu M Laikaw chuan Khuallian ni tura sawm a ni chu lawmawm a tih thu a sawi a, media workshop hlawhtling tak nei turin duhsakna a hlan nghal. Chanchinbumite chu hun rei tak ata tawha mipui rawng an lo bawl tawhnaah lawmthu a hrilh a, tunlai internet khawvelah an thiamna leh theihnate tat hriam a, mipui mamawhna anga in her rem thiam zel turin a chah.
MADC Sawrkar in New Maraland Vision a neih zinga pawimawh tak pakhat chu Good governance a ni a ti a, chumi hlawhtlinna tura pawimawh chu dikna leh felna nena rorel ,Dan chungnunna, eiruk awmlohna, sawrkar hnathawk zawng zawng intluktlanna, inrelbawlna felfai taka kalpui leh ruihhlo do te a ni, a ti. New Maraland Vision an neihte ti hlawhtling turin rilru leh ngaihtuahna thar neih (moral reformation) a pawimawh a, sawrkar in dik taka ro a rel theihna turin mipui pawhin an tawiawma , an puihbawm zel theih nan mipui rilru sukthlek zirtirna kawngah theihtawp chhuahpui turin a sawm. Mahni dinhmun theuh chu Pathian remruata pawm thiama, mahni mihring puite dawmkangtu nih chu malsawmna hnar a nih thu a tarlang bawk.
Chanchinthar thehdarhtute chu Sawrkar leh mipui inkar an ni a, palai an nihnaah mipui rawngbawltu an nihna chu an rilruah vawng reng turin a chah a, Sawrkar atanga mipui hriattur pawimawh zawng zawng Palai hna thawktu an nih vangin an hlu hle a ti bawk a ni. Tu pawh sawrkar se tha taka thawhpui thiam turin leh neutrality vawng tlat thin turin leh an thu ziah leh sawite chuan mahni khua leh Ram tichhe thei zawng a ni em tih ngaituah fo turin a sawm bawk. Siaha District-a Damdawi hluar ta lutuk chu pawi a ti hle a, chu damdawi hluar ta lutuk in a hrinchhuah HIV AIDS, Hepatitis vei an thahnem tawh hle tiin chhanchhuah hna kalpui dan tur uluk taka ngaihtuah pui turin leh ram leh hnam chhanchhuak tura mipui zirtirna kawngah theihtawp chhuahpui turin a ngen bawk a ni.
Media workshop hi session hniha then a ni a, Session khatna hi Pu Jeffrey Khara, Editor Moonlight, MJA Siaha President charge la mektu chuan a kaihruai a, Pu T Lalrosiama chuan hunserh hmangin Pi K Ngosai, DIPRO chuan lawmthu sawina a nei bawk a ni.
Session hnihna hi Pu Jeffrey Khara kaihruaina in Pu Vanneihtluanga ziah ‘Traditional Media leh New Media’ tih leh Dr H Laldinmawia ziah ‘Mizo tawng ziah dan dik’ tih thupui zirho a ni a, sawihona leh rawtna te neih niin hun hlawk thlak tak hmanho a ni.
