July 2025 atangin Mizo Territorial Army a tang tur lak ani dawn
Rauthla 10.6.2025 (Thawhlehni) : Indian Army hnuaiah Mizo hlang awmna, Mizo Territorial Army Battalion (Home & Hearth) din a ni dawn a, thla thar, July thla atang hian district hrang hrangahte Territorial Army a tang tur lak tan a ni dawn.
Mizoram sorkar hnuaia Coordination & Land Search Committee, Chairman, Lt. Col. Clement Lalhmingthanga MLA chuan vawiin khan Aizawl Press Club-ah thuthar thehdarhtute kawmin, tun dinhmunah Mizorama Territorial Army (TA)-ah hian mipa chauh lak an ni rih dawn a, kum 18 atanga kum 42 inkar mipa Mizorama piang leh seilian an ni ngei tih finfiahna lehkha pawimawh an neih a ngai dawn a ni a ti.
Ruahman lawk ang chuan TA a tang tur lakluhna hi June ni 14 atanga tan tur ni mah se, ruahsur nasa leh harsatna dangte avangin thla thar, July thlaah sawn a ni a, Aizawl district-ah TA a tang tur lakluhna hi neih hmasak ber tur a ni a, July ni 26-ah neih a ni dawn a ni.
July ni 27-ah Champhai leh Siaha district-ah, July ni 28-ah Mamit leh Serchhip district-ah, July ni 29-ah Kolasib leh Khawzawlah, July ni 30-ah Lunglei leh Lawngtlaiah, July ni 31-ah Saitual leh Hnahthialah te neih a ni dawn a, August ni 1 leh ni 2 chu Reserve day atan an dah bawk a, written test paltlang te chu medical test neih pui leh an ni dawn a, chumi paltlang te chu November thla tirah Shillong-a Assam regiment training centre-ah thla 6 vel training tura ruahman a ni.
Mizorama Territorial Army bul tan nan hian Company pahnih a awm dawn a, company pakhat-ah officer pakhat leh Junior Commissioned Officer, JCO pali, bakah Other range-92, an vaiin mi 102 an awm dawn a, officer dil hun chhung chu vawiin khan a tawp tawh a, Mizo tan bik ni lovin ram pum huapin a dil theih a, officer 19, hmeichhe pakhat leh mipa 18 lak an ni dawn a, July ni 20-ah exam buatsaih a ni dawn a, other range dil tur te tan pawl 10 pass nih a ngai thung a ni.
Tun dinhmunah Mizo Territorial Army Battalion te awmna tur hmun nghet chungchangah thutlukna siam a la ni lo a ni.
