June 11, 2025 hian Green Mizoram Day Lawngtlai ah hman ani dawn
Rauthla 04.06.2025 (Nilaini) : Vawiin Ni 4.June,2025 hian Lawngtlai District Bawrhsap Pu Cheemala Siva Gopal Reddy, IAS District Level Committee on Green Mizoram, Lawngtlai kaihhruaina hnuaiah Green Mizoram Day, 2025 Lawngtlai District hman dan tur ngaihtuahin DC Conference Hall ah an thukhawm.
Chairman District Level Green Mizoram 2025 leh Lawngtlai District Bawrhsap nibawk Pu Cheemala Siva Gopal Reddy, IAS chuan, kumtin thing kan phun a, a enkawlna kawngah tan kan lak leh si loh chuan awmze nei lovin thing kan phun zel dawn tihna ani a. Heng kan thingphun te hi a phun ringawt ah duh tawk mai lova, a enkawlna kawngah ngaihtuahna thar seng a, tan kan lak thar a ngai hle ani, a ti a. Hei hi Department te mawhphurhna ah Chauh dah lova, mimal tin ten kan mawhphurhna ah ngai ila. Tin, Village Council hrang hrang te pawhin mahni awmna veng/khua ah theuh te kan thingphun enkawl puitling tura tan kan lak a ngai ani, a ti bawk.
Kan ram in hmasawnna kawng hrang hrang a hmu chho mek zel a. Nimahsela, chu hmasawnna chuan kan ramngaw tha tak tak a tichereu mek zel bawk si a. Tin, khuarel chhiatna / leimin te avang te pawhin a awm bawk a. Chuvangin, keini ho hi kan ramngaw te humhalh tu leh ramngaw tha neih a pawimawi zia te, thingphun enkawl puitling pawimawh zia te hi midangte zirtirtu nih pawh i tum theih ang u, tiin member te a sawm bawk a ni.
Green Mizoram Day 2025 hmanna turah hian Lawngtlai District Bawrhsap Pu Cheemala Siva Gopal Reddy, IAS chu khuallian ani ang a. Pu K.Lalthanzara, Executive Secretary LADC chu hun kaihruaitu ani bawk ang. Pu K.Lalromawia, Member Secretary District Council Conservator of Forest, LADC in report leh thingphun kal dan tur sawina a nei bawk ang.
Lawngtlai District a Green Mizoram Day a thingphun-na tur atan hian National Highway-54 (Saikah Lower to View Point) tura ruahman niin, kumin ah hian thing tiak 390 phun tura kalpui a ni a. State sorkar atanga thu an hmuh angin kumin bik ah hian Mizoram Tree Herhse (Mesua Ferrea) chu a tam thei ang ber phun a ni ang a. Kumin November leh Feb,2026 ah te heng thingphun-na hmun tihfai hnatlang chu a phuntu Department ten neih nise, an ti bawk a ni.
