LADC a CEM Pu N.Zangura'n leimin avanga harsatna tawkte a tawrhpui
Rauthla 04.06.2025 (Nilaini) : Lai Autonomous District Council a Chief Executive Member Pu N.Zangura chuan tunlai ruahsur nasa avanga Mizoram hmun hrang hrangah chhiatna a thleng nasa em em a, leimin leh tui lian avangte-in keini Lawngtlai District pawhin harsatna nanem lo kan tawk a. A bik takin Lawngtlai Chandmary a In dinglai pahnih leh in rel lai pahnih leh Bazar vengah In pathum lai mai a chim chu pawi a tih thu leh chhiat tawk chhungkua te a tawrhpui thu a sawi a. Chutih rualin chenna In chan te, dawr bungrua tam tak chan te, mahni chenna in a riak ngam lo tam tak an awm chu pawi a tih thu leh a tawrhpui thu a sawi a ni.
Pu N.Zangura chuan, midangte pui tura kan rilru lo puitlinzia leh kan inphalzia te, lirthei hmanga sumdawngtu te’n remchang la mai lo a, a thlawna hman theih tura thuchhuah an nei te hi Kristian nih nawmzia min hriat nawn tir a, an chhuanawm ka ti hle a. Kan nitin mamawh zuartute pawhin kan thil zawrhte man tisang mai lova, mipuite mamawh hrang hrangte man pangngaia zuar zel turin ka ngen bawk a ni, a ti.
Pu N.Zangura chuan, thawhhona tha tak leh ruahmanna fel tak Central YLA ten neiin, chhanchhuahna hnathawktu State Disaster Response Force (SDRF) 3rd IR Battalion, Thingkah , Assam Rifles, District Disaster Management & Rehabilitation leh Quick Response Team-te, Branch hrang hrang YLA member te, VC leh mi inpek thawkrim tak tak te, an inpekna a ropuiin zahna chibai ka buk tak meuh meuh a ni, a ti a. Chhiatna tam zawk a thlen loh nan mipuite’n sawrkar thuchhuah leh thupekte zawm theuh ila, chung lam tanpuina Pathian hnena dila tawngtai turin ram mipuite ka sawm tak zet a ni, a ti bawk.
