Sorkar laipuiin Mizorama leimin leh tuilian tuarte a ngaihven
Rauthla 04.06.2025 (Nilaini) : Sorkar laipui chuan tunhnai ruahsur nasa vang -a Mizoram hmun hrang hranga chhiatna thleng te a rawn ngaihven a. BJP National President JP Nadda chuan Mizoram BJP President Vanlalhmuaka rawn biain, Mizoram a ruah sur nasa vanga leimin leh tui lian tuar hrang hrang te report tura a hrilh bakah, state sorkar hma lak dan pawh lo enzui turin a chah bawk.
Hetih lai hian BJP Mizoram President Vanlalhmuaka leh Union MoS for Ministry of Road Transport and Highways Ajay Tamta te chu Raj Bhavan ah inkawmin, Mizoram road infrastructure dinhmun te leh tun hnaia ruah sur avanga chhiatna hrang hrang thleng leh tanpui an nih theih dan turte an sawi dun a, heng bakah hian Hnahthial district a hmasawnna hna thawh hrang hrang te an hna thawh dan tha an tih loh thu leh siam that a nih theih dan tur an sawi dun bawk.
Mizoram BJP President Hmuaka chuan Union Minister of State for MoRTH Ajay Tamta hnen -ah Mizoram inkalpawhna kawngpui hrang hrang NHIDCL in an siam zawh tawh te, an siam mekte leh an la siam belh turte chak zawk a hnathawh a nih dan turte sawiin, a hun taka hna thawh zawh a nih theih dan turte a sawipui a.
Mizoram sorkarin kawng an enkawl mekah, sum a neih loh vang leh hna tha taka thawh a nih loh avanga mipuiin an tawrh dan te, PMGSY kawng siam a that tawk loh bakah kawng tha leh tlo Mizoramin kan neih theih dan turte chu Union Minister hi a sawipui a ni. Union Minister Ajay Tamta chuan Mizoram chu kawng leh infrastructure development hnathawh lamah an thawk uluk lo chu ngun taka ngaihtuah a ngaih thu a sawi a, ram leilung leh sik leh sa awm dan en chunga uluk taka Kawngpui siam a ngaih thu a sawi bawk a, Kawng siamna a mawhphurtu te pawh in Ram rohlu kan enkawl ani tih hria a, mahni ta anga hna thawk turin a chah a ni.
