Pu C. Lalsawivunga, Minister, DC&MA, GoM chuan, LADC Office a tlawh a, LADC CEM's Conference Hall-ah LADC hruaitute nen inkawmhona an nei.
Rauthla 13.06.2025 (Zirtawpni): Vawiin hian Pu C. Lalsawivunga, Minister District Council and Minority Affairs Department, Government of Mizoram chuan LADC Office tlawhin, LADC CEM's Conference Hall-ah inkawmhona neih a ni a, Pu N. Zangura CEM LADC chuan hun a kaihruai a ni.
Minister Pu C. Lalsawivunga chuan thusawiin, LADC Office a tlawhna hun remchang a neih chungchangah leh an lo dawnsawn danah lawmawm atih thu asawi a, DC&MA Minister a nih hnua a tlawh vawikhatna a ni nghe nghe a ni. LADC in harsatna aneihte chu atul ang zela bawhzui a nih tur thusawiin, hlawh chungchanga an harsatna pawh sutkian mek zel a nih thu a sawi bawk. Hmalam hunah pawh LADC Sorkar nen thawhhona tha tak neia, hmasawnna tur kawng hrang hrangah hmalak chhunzawm zel a nih tur thu a sawi tel bawk.
Pu C. Lalsawivunga chuan LADC - ah thawktu mi tha tak tak an awm khawm chu lawmawm a tih thu sawiin, Lawngtlai district mipuite tana theihtawp chhuah chhunzawm zel turin a chah a. Mizoram leh hnam hmasawnna kawngah Laifaten an thawh hlawk thin hle chu chhuanawm a tih thu tarlangin, hmalam hunah pawh tan la thar zel turin a sawm a ni.
DC & MA Minister chuan hun reilote chhunga LADC ah CEM panga (5) lai neih a ni chu thinlung taka veiawm a tih thu a sawi a . Anmahni thlang tlingtu mipuite zahawmna hriaa, mahni inenfiah thar turin MDC- te a chah a. Sawrkar ngialnghet tak siam turin mipuiin an aiawha an thlante an pawimawh thu sawiin, Minister chuan LADC - a Sawrkar nghet tak siam turin rilru thar put a tul hle a ti. Insiam that nan hun a tlai lo tih tarlangin, Minister chuan rinawmna leh dikna a taka nunchhuahpui turin sawm bawk.
Pu C. Lalsawivunga chuan LADC buai avanga mipuiten harsatna an tawh mek sawrkarin a hriatpui thu a sawi a. Mizoram sawrkarin Lawngtlai mipuite tan theihtawp a chhuah reng thu tarlangin, tun dinhmunah Lawngtlai Treasury - ah LADC sum cheng vaibelchhia 30 bawr vel a awm tawh thu a sawi a. LADC lamin budget an pass theih loh avanga lakchhuah mai theih a ni lo chu pawi a tih thu a tarlang. DC & MA Minister chuan Chief Minister - in a lo tiam tawh angin, Mizoram sawrkarin 'Direct Funding' leh '10th Schedule ( Anti- defetion Law)' chungchangah sawrkarlaipuia recommend a pek tawh thu a tarlang bawk.
Tin, Pu N. Zangura CEM LADC pawhin thu sawiin, Pu C. Lalsawivunga, Minister DC&MA in a rawn tlawh chu lawmawm a tih thu leh LADC tan hun lawmawm tak a nih thu a sawi a, LADC in harsatna a tawh thin chungchangah pawh theih tawp chhuaha hmalakpui turin an a beisei thu leh tuna an harsatna tawh mek hlawh chungchangah pawh hma min lakpui tawhna ah lawmthu ka sawiin rualin, hmalam hunah pawh theih tawp chhuaha hma min lakpui zel kan beisei a ni, a ti a. Pu N. Zangura CEM hian lawmthu sawi nan, Lai hnam kutchhuak Chawngnak puan leh Hnika a hlan bawk.
He inkawmhonaah hian, Pu T. Zakunga, Chairman LADC, MDC-te leh LADC Official-te an tel tha hle . Minister hian LADC Secretariat Building dinhmun a hmunah a enfiah nghal a. LADC Main Building awngrawp tawh sakthatna tura recommendation an siam tawh thu a sawi bawk. Hemi hnu hian Chairman, LADC Room tlawh lehin, LADC Session Hall a tlawh tel bawk a ni.
