Lawngtlai khawpui ah Leimi avangin In pasarih luah tlak lo im a chhia (30/5) ~ Elvis Lalthangzuala Accredited Journalist

Lawngtlai khawpui ah Leimi avangin In pasarih luah tlak lo in a chhia  (30/5)

~ Elvis Lalthangzuala Accredited Journalist

State Meteorological Centre, Govt of Mizoram thuchhuah in a tarlan danin Bay of Bengal-a cyclone thlipui insiam (deep depression ) avanga Mizoram ah ruah a sur tam tur thu tarlan ani a. Hemi avangin hian sorkar pawhin ni hnih chu zirlaite tan chawlh a lo puang nghe nghe anih kha. Lawngtlai khawpui ah pawh zirna In hrang hrang te an chawl a, ni 29.05.2025 ah erawh ruah a sur tam lutuk lova, ni 30.05.2025 ah erawh zing atangin ruah a tla deuh reng a. Social media hrang hrang ah Mizoram a chhiatna thleng hmuh tur a awm a,Lawngtlai District ah pawh hmun thenkhat ah te hriattur a awm bawk a. Lawngtlai khawpui chhung ah chanchin tha lo hriat tur a awm dawn ta lo emaw kan tih laiin Dt 30.05.2025 zan dar 10:45 pm ah chuan chhiatna duhawm loh tak mai kan tawk ta tlat mai. A pawi, a pawi ani tih mai loh chu sawi tur a vang hle mai 

Lawngtlai Bazar leh Chandmary inrin-na ah chhiat kan tawk ta tlat mai. Hei hi Sipai tlang kan tih mai thin, chumi atanga lei lo hnawl thla niin a lang a. Lawngtlai Bazar lam ah hian In dinglai pathuam Pi Vanlalhlupuii Fanai, Pu B.Vanhnuailiana In leh Pu C.Lalchungnunga In te a ni a. Tin, Chand-mary lamah hian Pi C.Nihluani m/o F.Rothuama, Pu F.Lalnithanga (In rellai), Pu F.Rothuama In (In rellai) leh Pu B.Lalmalsawma In te chu leimin hian a hnawl ta a ni. He chhiattawhna ah hian In luah lai panga leh inrellai (In sak lai) pahnih a chim a, hei hian National Highway a hnawh ping vek a, DC Office panna kawng pawh a thla bal bawk a ni. 

Zan thim a ni a, ruah a sur reng bawk si a, duh angin tlawmngai pawl te an che thei lova. Dt 31.05.2025 ah khawpui chhung YLA ten hnatlang hi an ko ta a ni. Hriat theih chin ah Hlimna tak leh nunna chan an awm hriat a la ni lo

    Pi Vanlalhlu-puii Fanai Building hi Floor nga (Ground floor nen) a awm a.  Ground Floor ah hian dawr pathum a awm a, First Floor ah GDC Office a awm bawk a, a bak floor dang te hi mihring chenna niin chhungkaw nga (5) in an luah a ni.  He Building ah hian Pari Hotel awmin an ni hian Rakhein lam mikhual 21 an nei a. Hemi zan hian an mikhual 18 te chu an tlanchhuak hman vek a. Tin, chhungkaw dang luah ve te pawh hi an tlanchhuak hman vek a ni.

Pari Hotel a mi pathum la awm te hi lemin in In a hnawl ah hian a chhilh hman ta a. Dt 30.May,2025 zan ah hian mi pakhat Thunhlaing (53) S/o Mang Saw Tuin chu lakchhuah nghal a ni a. Tin, a tuk (31.05. 2025) zing dar 10:00 Am ah Zawhnai Thuin (48) S/o Awngchaw ting chu lakchhuah veleh a ni a, ani hian a thianpa chu a la dam thu sawiin, lak chhuah tumin theihtawp chhuah a beih a ni a. Tichuan zan dar 7:48 pm ah Mawngte Hlan (45) S/o Mauwen chu dam taka lak chhuah a ni ve leh ta a ni. Pari hotel a thleng Rakhein mi pathum te chu dam taka lak chhuah an ni a, damdawi In ah zan khat riak in a tuk ah an chhuak leh nhgal a ni.

Tin, Pi Vanlalhlupuii Fanai Building bul chiah hi Pu B.Vanhnuailiana Building a ni a, he building hi dawr atan luah vek a ni a, a lan danin dawr pali atan luah a ni a, hemi zan hian riak an awm hriat a ni lo. 

Tin, Building pathum-na hi Pu C.Lalchungnunga In a ni a, he building hi Ground floor chhiar telin Floor thum a awm a. A hnuai ber hi dawr atan mi pahnih HP.Electrical Stores leh AK.Store (Whole sale dawr) a awm a. Hemi chungah hian Annie Restaurant (Machhini Bethel Veng) a awm a, chumi chung leh chu In neitu Pu C.Lalchungnunga te an awm ve thung a ni. Hemi zan hian Pu Chungnunga leh an nau Zakaria te In ah an awm a, In neitu pa hi Khum in a delh a, hemi zan hian an awmpui nen hian him dam taka lakchhuah an ni bawk a ni.

 Lawngtlai Chandmary lamah hian Pu B.Lalmalsawma (Council veng) Assam type chu a chhak ber ah awmin luah lai a ni a, a thlang ah Pi C.Nihluani m/o F.Rothuama te Building a ni a. He Building ah hian chhungkaw hnih a Building neitute chhungkua leh an fate an cheng a. A hnuai ber hi mi pathum in dawr atan an luah ve thung a ni. Tin, In rel lai pahnih hi Pu F.Rothuama leh Pu F.Lalnithanga te Building a ni a bawk a. Tichuan, Lawngtlai Chandmary lamah hian Building pali a chim tihna a ni.

Chhiat tawh thu hi Central YLA hruaitute’n an hriat veleh a hmun an thleng nghal a, sorkar thuneitute pawhin a hmun hi an thleng nghal bawk a. Zan thil anih avangin duh angin chet lak theih a ni lova. Tichuan, Dt 31.05.2025 atangin State Disaster Response Force (SDRF) 3rd IR Battalion, Thingkah , Assam Rifles, District Disaster Management & Rehabilitation leh Quick Response Team Lawngtlai District Bawrhsap ruahmanna leh Central YLA hruaitute kaihhruaina hnuaiah theihtawp chhuahin hma an la a, hnatlang pawh hi an la chhunzawm zel a. Kawng hi engtik ah nge a tlang dawn tih hriat a la ni lo a ni.

Inchim vanga National Highway 02 ping chu sialtlang theih huntur a la hriatlohva, kawng pinna lai hi Metres 150 chuang vel niin, bungrua senghawi ngai a la tam vangin kawngpui  tlang huntur hi a la hriatloh.

National Highway-02 a pin vang hian Lawngtlai khawpui ah Hmar lam atanga Chhimlam pantur Lirthei, Medium Motor Vehicle chin hnuailam chu Bazar Veng atangin Chandmary lane hnuai kawng zawhtir an ni a, Chhimlam atanga Hmarlam panturte chu National Highway 502A (Multi Modal kawng) zawhtir niin, Motor lian tan Lawngtlai khawpui paltlang theih a nilova, By pass Road ah kalvek tura tih an ni.

Lawngtlai a Inchimna hmun hi Lawngtlai West MLA Pu C.Ngunlianchunga chuan Inrinni atang khan thutchilhin, Lawngtlai East MLA, Dr.Lorrain Lalpekliana Chinzah pawh Aizawl atangin Lawngtlai thlengin  inchimna hmun hi a tlawh a. Hnatlang hi la neih chhunzawm tur a ni dawn a. Hnatlang hi CYLA ten ruahmanna an siam thin a ni. 

    National Highway 02 kawng a pin tak avangin lirthei eng chi mah a kal tlang thei lova, sorkar leh NGO te tangkawp in theihtawp chhuahin hnatlang hi thawh mek zel a ni a. Bungrua eng emaw zat chu a tha pangngai taka lak chhuah te pawh a awm nual a. Chutiang bawkin he building in a chim hnan zingah bungrua pawh la tha tura beiseina tam tak a awm avangin duh angin hna hi a kalpui theih loh a ni.

        Kan sorkar pawhin ngaihtuahna ngun taka a sen a ngai hle dawn niin a lang a. Kum 1992 September 23 zan ah Lawngtlai in leimin nasa takin kan tuar tawh a. Tin, Kum 1995 May 17 ah chutiang bawkin leimin kan tuar tawh a. Nunna pawh eng emaw chan a ni a. Tuna leimin na hmun hi In sak ngam lohna tura ngaih ani a. Mahse, hun a lo rei a, a lei pawh nghet tha viau tawh a ngaih anih laiin a chhak atanga pialtlep a lei nghetlo lo tawlh thla chuan heng harsatna te pawh hi min siam ta em ni aw tih theih tur anih avangin, helai hmun hi chu sorkar in leilung lam mi thiam mi chah phei a, a dinhmun chiang lehzual a mipuite hriat an tarlan thuai hi a nghahhlelhawm tak zet a ni.

   Kan tun dinhmun ah chuan Lawngtlai Bazar atanga Electric Veng lam pan tur chuan ke chuan awlsam takin a kal theih mai a. Lirthei erawh chuan tihngaihna a awm dawn lo a ang tak riau mai. Sorkar in ngaihtuahna thuai tak seng a, kawng tha zawk kan neih theih dan tur pawh a ngaihtuah a ngai zel dawn a ni. 

        Tun tum chhiat Lawngtlai khawpui in kan tawhna ah hian mipuite kan tangrual hle a. Sorkar thuneitu lam te pawh an chetha hle a. NGO te pawhin thawhhona tha tak hnuaiah an che a hmuhnawm in a thlamuan thlak tak zet a ni. Tin, kan ram hruaitute pawhin Politics ngaihtuah hman miah lova, an tih theihna zawng zawnga hma an la te pawh kha a hmunnawm tak zet a ni.