Lungleiah kawṭhalo vanga naupang thihna a thlen loh nana ni 45 chhung beihpui thlak tur hawnna hun hman a ni

Lungleiah kawṭhalo vanga naupang thihna a thlen loh nana ni 45 chhung beihpui thlak tur hawnna hun hman a ni

 Rauthla 16.06.2025 (Thawhtanni) : Vawiin khan Lunglei District chhunga kawṭhalo (diarrhoea) vanga naupang thihna a thlen lohna tura, "Kawṭhalo ven nan faina leh ORS a pawimawh" tih thupui hmanga ni 45 (June 16 - July 31, 2025) chhung beihpui thlak, Stop Diarrhoea Campaign (SDC) kalpui tur chu Lunglei Venglai Anganwadi Centre-II-ah District Bawrhsap Pi Navneet Mann chuan a hawng.

        Pi Navneet Mann chuan naupangte taksa leh rilru lamah ṭha tak leh hrisel taka an ṭhan len theih nan an tet lai aṭangin hriselna leh chaw ṭha ngaih pawimawh a ṭul tih a sawi a. Stop diarrhoea campaign kalpui tur chu a hlawhtlin theih nan thawktute theih tawp chhuah tura chahin, nu leh pate pawh campaign chhunga ORS leh Zinc tablet semte chu ṭangkai taka hmang turin a chah a. Hriselna atan leh kawṭhalo laka him nan kut sil fai leh tui thianghlim chauh in pawimawhna chu vawng reng a, in chhungkhurah a taka hmang turin a chah bawk.

        He hun hi Lunglei District Deputy Chief Medical Officer Dr Lalrinthangi'n a kaihruai a. District Immunisation Officer (DIO) Dr Christina Zonunmawii chuan Stop Diarrhoea Campaign kalpui dan tur sawi fiahin, campaign chhunga naupang kum 5 hnuai lam kawṭhalo veite chu sub-centre emaw, ASHA te hnenah emaw report ṭhin turin nu leh pate a chah a. Sub-Headquarters MHIP ai awh Pi Vanlalthangi Chhakchhuak chuan kut sil dan a taka entirin, naupangte a zirtir a. Venglai ASHA Pi Malsawmdawngliani'n ORS siam dan leh hman dan tur a sawi fiah bawk a. Naupangte hnenah kawṭhalo venna leh enkawlna tur ORS leh Zinc tablet sem niin, PHED Lunglei WATSAN Circle-a Superintending Engineer Er Lalsanga chuan lawm thu sawiin hun a khar a ni.

        Stop Diarrhoea Campaign hi kawṭhalo vanga naupang kum 5 hnuai lam thihna a thlen lohna tura beihpui thlakna niin, kawṭhalo ven beihpui thlak chhung hian anganwadi centre, sikul leh damdawi in hrang hrangahte ORS & Zinc Corner siama damdawi (ORS & Zinc) sem hi kalpui a nih dawn bakah, kawṭhalo ven dan leh enkawl dan te, tui thianghlim in leh hman pawimawhna te, kut sil fai pawimawhna leh kut sil fai dan te, faina leh thianghlimna chungchanga naupangte leh anmahni enkawltute tana hriat tur pawimawh hrang hrang inzirtirna te buatsaih a ni ang.

        Nikum 2024-a kawṭhalo ven beihpui thlak kalpui chhung khan Lunglei health district (Lunglei District leh Hnahthial District inkawp) chhungah kawṭhalo ven/enkawl nan ORS leh Zinc tablet pek tur naupang kum 5 hnuai lam 14,408 tinzawn niin, mi 14,661 (101.76%) hnenah pek a ni a. Kumina SDC kalpui chhung hian Lunglei leh Hnahthial district-a naupang kum 5 hnuai lam 14,962 tinzawn leh an ni a. ORS bawm (packet) 2 zel leh Zinc tablet mum 14 zel pek tura ruahman a ni.