Lungleiah thu thar theh darhtute tana tun lai thiamna ruala hma sawnna tur leh Mizo ṭawng hman dan dik zir hona buatsaih a ni

Rauthla 24.June.2025 (Thawhlehni) :Directorate of Information & Public Relations (I&PR) leh Mizoram Journalists' Association (MJA) General Headquarters te ruahmanna zuiin, Lunglei District I&PR Office leh Lunglei District MJA ṭang kawp chuan vawiin khan Lunglei Press Club-ah Lungleia thu thar theh darhtu (media)-te tana tun lai thiamna ruala hma sawnna tur leh Mizo ṭawng hman dan dik zir hona, 'Media Workshop' an buatsaih.

        He zir honaah hian I&PR-a thawkte, MJA pawl mite, Akashvani Lungleia Aaj Subah thu thar puangtute, Zonet JB-a chanchin thar buaipuitu leh puangtute, Doordarshan Kendra (DDK) tana thu thar la khawmtu leh youtube-a thu thar theh darhtute an tel a. Lunglei District MJA President Pu H. Lalthansanga chuan inkhawm kaihruaiin, zir hona buatsaih a nih dan leh inlawmna thu a sawi a. Prominent Journalist Pu CS Chawngchhuma'n hunserh a hmang a. Zir hona leh sawi hona buatsaih chhunzawm niin, Lunglei District MJA Information Secretary Pu F. Lalngaihzuala'n chanvo bil neiin, kal khawmte a chawk hlim a. MJA member Pu H. Vanlallawma'n ṭawngṭaiin hun a khar a ni.

He media workshop-ah hian Pu Vanneihtluanga ziak, "Traditional media leh new media" tih chu Lunglei District Information & Public Relations Officer Pu C. Lalhruaitluanga kaihhruaia zir ho niin, thu thar theh darhna hmanrua leh kalphung danglam zel dan leh tun lai thiamna ruala ṭha, ṭangkai leh hlawk zawka media-te hma sawn theih dan turte zir ho a ni a. Dr H. Laldinmawia ziak, "Mizo ṭawng ziah dan dik" tih chu Lunglei District MJA Treasurer Pu K. Lalrinpuia kaihhruaia zir ho ni thungin, thu thar theh darhtu leh puangtute'n dik taka Mizo ṭawng ziak leh sawi a pawimawhna leh Mizo ṭawng humhalh a pawimawhna te, ṭawng hman sual leh hman dik loh langsar zual leh a dik zawkte zir ho a ni a. He'ng thupui hmang hian sawi hona hun hlawk tak hman a ni bawk.