Mahni hmasialna, duhamna leh hlemhletna awm lohna, NGO tha taka siam turin tan i la thar ang u - Dr.Lorrain Lalpekliana Chinzah, MLA
Rauthla 30.June. 2025 (Thawhtanni) : Vawiin chawhma dar 11:00 AM khan Lai Women Association ( LWA) Council Veng Branch chuan LADC Conference Hall, Council vengah kum 25 an tlin lawmna an nei a. He hunah hian Dr. Lorrain Lalpekliana Chinzah, Adviser to Chief Minister ( H& FW, A & FW ) leh Lawngtlai East bialtu MLA nibawk chuan khuallian niin a hmanpui.
Dr. Lorrain Lalpekliana Chinzah chuan LWA Council Veng Branch leh Silver Jubilee- lawm tura lokalte hnena lawmthu sawina a nei hmasa a. Harsatna tam tak kara nghet taka kal a, kum 25 lai an thlen theihnaah LWA Council Veng chhuanawm a tih thu a tarlang a. LWA chu Lawngtlai district- a hmeichhe pawl lian ber a nih angin ram leh hnam hmasawnna turin theihna lian tak an nei tih inhria a, hmalam hunah theihtawp chhuah zel turin a sawm a. Adviser to Chief Minister chuan Lai tawng humhalh leh tih hmasawnna tura LWA Council Veng Branch, hmalakna fakawm a tih thu tarlangin, chin tha a nih anga chhunzawm zel turin a fuih. Ruihhlo avanga ramin harsatna a tawh kawngah sawrkarin theihtawp a chhuah tih sawiin, MLA chuan LWA - te thahnem ngai taka sawrkar tawiawm tlat turin a sawm a. Chhungkaw kehchhia atanga seiliante chu ruihhlo khawih an tam bik hle nia ahriat thu tarlangin, Dr. Lorrain Lalpekliana Chinzah chuan hei hian nu leh paten mawhphurhna an neih nasat zia a tichiang hle a ti. A bik takin LWA chu chhungkuaah nu ber an nih angin, fa enkawl kawngah tan la thar tura fuihin, tha taka fa an enkawl chuan ram nuam leh chhenfakawm siam a ni thei dawn a ni, a ti.
Khualliian chuan harsatna siamtu ni lo a, remna leh muanna thlentu nih a pawimawh zia tarlangin, midangte tana malsawmna thlenu nih i tum theuh ang u tiin a fuih a. A bik takin Nuin a mawhphurhna tha taka a hlen chuan ram leh khawtlang nuam siam theih a ni ang a ti. Fate enkawl kawnga thangharha kawngdik an zawh theih nana khalhngiltu ni zel turin a fuih a. Nu hmangaihna pawimawh zia sawiin MLA chuan ram leh hnam innghahna tlak fa nei tura hmangaihna nen fa enkawl thin turin LWA member zawng zawngte a sawm.
Lawngtlai East bialtu MLA chuan hmeichhiate dinhmun chawikan a hun tawh tak zet thu a sawi a. Mizoram sawrkar pawhin hmeichhe dinhmun chawisan ngai pawimawh hlein, Cabinet Rank- ah hmeichhia a dah hial a ni, a ti. Hmeichhiate dinhmun chawikang turin sawrkarin theihtawp a chhuah chhunzawm zel dawn tih a tarlang bawk. MLA chuan LADC buai avanga hlawh lak theih loh sukiang turin Chief Minister - in theihtawp a chhuahpui tih sawiin, hlawh pawh lak a ni ta chu lawmawm a tih thu a sawi a. Dr. Lorrain Lalpekliana Chinzah, chuan Mizoram Universal Health Care Scheme ( MUHCS) hman mek chuan damlote inenkawl kawngah awlsam zawkna a thlen mek a ti a. Pawisa chawi lâwk ngailo a sawrkarin bill a pek thin angin, a chhawrtu tan a awlsamin a tangkai em em tiin, mipui tam zawk in ziaklut turin a sawm a ni.
Dr . Lorrain Lalpekliana Chinzah chuan LWA chu NGO pawimawh tak anih angin a zahawmna humhim tlat turin kalkhawmte a chah a. Mahni hmasialna, duhamna leh hlemhletna awm lohna, NGO tha taka siam turin tan i la thar ang u tiin a sawm a. Ram leh hnam hmangaihna nena hmalam huna kal zel tur leh LWA thiltum 'Bawmh Chanh Hau Bawmh (Tanpui ngaite tanpui)' tih chu a taka nunpuitu ni zel turin duhsakna a hlan a. Dr . Lorrain Lalpekliana Chinzah chuan LWA Council Veng ten Silver Jubilee an lawmna pualin thilpek a hlan nghal bawk.
Lai Women Association ( LWA) Council Veng Branch 'Silver Jubilee' lawmna inkhawm hi Pu Elvis Lathangzuala, Organising Chairman, chuan a kaihruai a. Pi Vankungpuii, General Secretary, LWA Gen. Hqrs, chuan 'Silver Jubilee' puala buatsaih 'Souviner' tlangzarhna neiin, Pi Lalthianghlimi,Vice President, LWA, Council Veng Branch, chuan lawmthu sawina neiin hun a khar.
Lai Women Association (LWA) Council Veng Branch hi May ni 21, kum 2000 khan din niin, tun dinhmunah hian member- 360 an awm mek a ni.
