Mistiri ten VC thenkhatin rate an bituk sak thin hrethiam lo
Rauthla 03.06. 2025 : Mizoram Mistiri Association (MMA) General Headquarters chuan Mizoram chhunga khaw hrang hranga mistiri-te daily rate chungchangah khaw thenkhat VC ten an khaw chhunga mistiri ni khat hlawh (daily rate) bi tukin Rs. 700-750 aia sanga thawk lo turin thu chhuah an siam thin tih chungchanga a hnuaia mi ang hian thu chhuah an siam:
Mizoram sawrkarin a hna thawkte hlawh bi a siam hian mistiri (carpenter) a chhawr dawnin skill I category, Group C level-a dah an ni a. Labour Department hnuaia Con-struction Works minimum wages rate mila rawih an ni thin. Minimum Wages committee-in rate hniam ber (minimum) aia hniama chhawr loh tur tih a ni. He Committte-ah hian MMA pawh hi telh kan ni. LESDE-in April 1, 2023-a notification a chhuah ang chuan Skill 1 hian Rs. 730 aia hniam a hlawh tur a ni lo. Sawrkarin a chhawr hian mistiri chuan kut ruakin a thawk chhuak mai thin.
Hemi ang hian mistiri chuan thawk thei kan ni lova. A hmanrua (tools) a intum vek thin avangin MMA General Assembly 2018-a thu pass chuan Mistiri ni khat hlawh hỉ Rs. 800 (minimum) ni se kan ti a. Hmanrua eng kim a intum vek tur a ni tih a ni. Hetiang hian Mistiri chuan thawk thin tur leh khawtlang hruaitute pawhin min lo hriatpuia an khaw chhunga mistiri-te hlawh chungchangah MMA duh anga lo rem tihsak turin kan ngen a ni.
Thil man to zel leh hmaraw man to zel avang tein Mistiri Rs 800 aia hniam hlawh tura VC thenkhat thu chhuah hi kan pawm thei lova, Mistiri chu a thiamaa leh a hmanraw hman dan azira Rs. 800 aia sanga an chhawr thei a nih chuan an inbiakremna a ni ang, tiin.
