MZU ah NEP 2020 kalpui chho tan

 MZU ah NEP 2020 kalpui chho tan

Rauthla 09.06.2025 (Thawhtanni) :National Education Policy (NEP) 2020 chu Mizoram University-ah kalpui chho tan mek a nih avangin zir dan kalphung pawh nasa taka thlak danglam mek a ni. NEP 2020 in a a tum ber pakhat chu thil chhui bing (research oriented) zawnga zirlaite kalpui a ni a. Kum danga an lo kalpui thin dan a bik takin theory paper chu nasa takin tihtlem a ni tawh a, chumi ai-ah chuan a taka thiltih (project work) zirlaite’n semester khatna, hnihna leh thumna-ah field work an kalpui a, dissertation hi Semester palina a thehluh turin Semester pahnihna atangin an tan chho a ni. 

        Hetiang hian hmun hran hranah thil hrang hrang zirchiangin an kal a, field work in a tum ber chu thil zir chian a nih avangin topic hrang hrang an rilru a an veite leh zirchian an chak te zirlaite hian an thlen a, chu chu zirtirtute’n lo enpuiin a tul angin an lo chulmam sak thin a. Zirlaite hian a hmunah va kalin zawhnate siamin a tul ang ang te va zirin an feh chhuak thin a, hemi avang hian class chhunga zirna pawh tihtlem vek a ni tawh. Tunah chuan Zirtawpni hi zirlaite'n field worka an kal theih na’na dah awl a ni tawh bawk. 

NEP 2020 hian tute emaw ziahsa vawn mai ni lovin, zirlaite irawm chhuak, anmahni ngeiin an va zir chhuah an mahni ngeiin an ziah chhuah leh anmahni theihna leh thiamna pholan chu a tum ber a ni a. A lehlamah chuan an lo kalpui thin theory paper tam tak paih a lo ngai ta a, a bik takin Mizo subject zirlai te, UPSC leh competitive exam dang dang bei turte tan chuan theory paper, competitive exam syllabus based a an lo buatsaih tam tak paihthen anih tak avang in. Hei hi competitive exam hmachhawn tur te tan tuna kalpui dan hi a tha ber em aw tih te naihtuahnaah an neih thin fo thin thu Mizoram University a Political Science department a Assistant Professor Pu J.C. Zomuanthanga chuan a sawi. Zirna ina inziahluh chungchangah NEP 2020 hian danglamna a thlen lo nia hriat a ni a, zirlai hi an pung tual tual niin Pu JC Zomuanthanga chuan a sawi a. Common University Entrance Test hman a nih hnuah India ram hmun hrang hrang atangin leh foreign lam atang pawhin Mizoram University an rawn thlen theih phah a ni a ti.