Ruihhlongaite enkawlna hmun nei te sorkar in One Day Training neihpui

 

Ruihhlongaite enkawlna hmun nei te sorkar in One Day Training neihpui

Rauthla 06.06.2025 (Zirtawpni) : Vawiin ni 6^th June,2025, hian Aizawl district huam chhunga Ruihhlongai enkawlna (Drug Treatment Centre) neitute chu Mizoram Social Defence & Rehabilitation Board, Directorate of Social Welfare, Government of Mizoram Training Hall ah ‘One day Training Programme on Accreditation for NGOs of Aizawl Disctrict’ neihpui an ni.

Sec 42 of the Mizoram Drug (Controlled substance) Act, 2016 in a phut angin Mizoram chhunga Drugs (Controlled substances) De-addiction & Rehabilitation lam kaihhnawih, Home emaw Centre emaw din reng reng te chuan Department of Social Welfare hnuaiah Accreditation (Dan anga inziahluh) tih vek a ngaih tawh dawn avangin training programme ah hian Accreditation atana tul leh pawimawh hrang hrangte zirtir an ni a. Inkaihhruaina Standard Operating Procedure (SOP) chungchang te uluk taka zirtirin, endikna an hmachhawn huna an mamawh leh tihtur tul-te (Documents) hrilhhriatna hun an nei bawk a ni.

Training programme khuhhawnna (Inaugural) hi Pi Zonunthari, Joint Secretary Social Welfare, Women & Child Development Department chu Chairperson niin a kaihruai a. Kalkhawmte inhmelhriatna te neihpuiin ruihhlongai enkawlna an lo kalpui tawhna-ah lawmthu a sawi.

Pu Malsawmzuala Ralte, Chairman, Mizoram Youth Commission chu khuallian a ni bawk.

Dr. Lalhriatzuali Ralte IAS, Director, Social Welfare chuan thu tawi sawina hun hmangin Accreditation pawimawhna leh Accreditation hian Centre leh Home hrang hrang te hmasawnna tur atana hmanraw tangkai tak a nihzia te a sawi bawk a. De-addiction & Rehabilitation lam kaihhnawih a home emaw centre emaw din reng reng te chuan Department of Social Welfare hnuaiah Accreditation (Dan anga inziahluh) tih vek tur a nih thu sawiin hriattirna pawh centre hrang hrangah te an pekchhuah vek tawh thu  a sawi.

Chief Guest, Pu Malsawmzuala Ralte, Chairman, Mizoram Youth Commission pawhin thusawiin, Centre hrang hrangte ruihhlongai enkawlna kawnga tha an lo thawh tawhna-ah lawmthu a hrilh a, tin, tunlai boruakin sorkar/kohhran/NGO/mimal tin ruihhlongaite enkawlna kawngah min bengharh a, kawnglehlama ngaihtuah chuan lawmawm a tih thu a sawi. Ruihhlongai tamtak enkawlna mumal dawng lova khawlaia awm ten enkawlna an dawn theihna tura Mizoram Youth Commission leh Social Welfare Department te thawhhona hnuaia HULHLIAP ‘Short Stay Centre’ an din tur hi lawmawm a ti hle a, ruihhlo ngaite pawhin damna lamtluang an zawhna kawnga rahbi pawimawh tak anih theih nan leh an tangkaipui ngei a beisei hle bawk a ni.

Pi Zonunthari, Joint Secretary Social Welfare, Women & Child Development Department leh Chairperson ni bawk chuan lawmthu sawina hun neiin Centre hrang hrang atanga lo kal-te vawiin programme ngaipawimawha an hun hlu tak senga an lo tel theih avangin lawmthu a hrilh a. Thahnemngai taka inenkawlna te lo kalpui zel tur leh Accreditation hnuaia SOP in min phut anga lo in herrem ve hret hret turin a sawm nghal bawk a ni.

Training programme hi Aizawl district huam chhunga Ruihhlongai enkawlna (Drug Treatment Centre) lam te pawhin an ngai pawimawh hle a, Home/Centre 22 (sawmhnihpahnih) atangin an lo tel a ni.