SASCI-ah a che hmasa nih a that thu Chief Minister in a sawi
Rauthla 06.06.2025 (Zirtawpni) : Vawiin khan Planning Department Conference Hall-ah Chief Minister Lalduhoma kaihhruaiin High Level Meeting on SASCI neih a ni a, Chief Secretary kaihhruaina hnuaia SASCI Monitoring Committee din an rel.
Lalduhoma chuan, SASCI kalpui meka sawrkar duh dan te a sawi hmasa a. SASCI hi kan ramin hmasawnna ruhrel tha leh tlo a neih theih nan a tha em em a, department ten tha thlah lo va tan kan lak a tul hle. Part 3 bikah hian, state leh UT ten Centrally Sponsored Scheme hmanga infrastructure kan thawhnaa state share-a kan hman theih tur sum crore singkhat dah a ni a. A che hmasa sa (first come first serve) tan a nih avangin kan chet ran zel hi a tha. Hmasawnna hnathawhna kawnga state rethei deuh ten harsatna kan tawh nasat tak mai chu state share tur kan nei thin lo hi a ni a. Part 3 hian chu mi a kan mutan chu min sutkiansak thei a ni, a ti. Department hrang hrang ten SASCI hmalaknaah theihtawp in chhuah thin a ni tih report pek atangin a hriat theih a, a lawmawm hle a ni, a ti bawk.
Lalmalsawma Pachuau, Secretary, Planning chuan kum SASCI part hrang hrang sawifiahna a nei a, chu mi hnuah hmachhawp awm te leh chak deuh zawka hnathawh a tulna lai te an sawi a. A bik takin reform link incentives hmuh theihna SASCI Part 5 - Mining Sector reform chungchang te, part 6 - Scrapping of Old Vehicles & Electronic Enforcement of Road Safety chungchang te, part 7 - Land related reforms by State Government in rural areas te, part 8 - land related reforms by State Government in urban areas te, part 9 - Incentives to state for efficiency in financial management chungchang te, part 10 - urban planning reforms 2025-26 chungchang te chipchiar takin an sawi zui. Incentives te hi a tam thei ang ber dawn tumin sawrkar chuan tan a la dawn a ni.
Meeting hian Chief Secretary kaihhruaina hnuaia SASCI Monitoring Committee din a rel bawk.
Meeting-ah hian Ministers te, Chief Secretary, Commissioner leh SASCI Implementing Department Secretary te, Planning Department leh official pawimawh dangte an tel a ni.
