Thalaite hmakhua ngaitu Pu Modi sorkar support hi a hun tawh hle - Dr.K.Beichhua, MLA
Rauthla 27.June,2025 (Zirtawpni ) : Vawiin khan Mizoram BJP party inkhawm ah Dr. K.Beichhua-a'n thusawiin, "Ṭhalaite'n tunah chuan BJP lam an hawi ṭhup tawh a ni, Pu Modi-a'n a ngai pawimawh ber 4 zingah ṭhalaite leh loneitute an tel a ni. Ṭhalaite leh loneitute tih chak kan ram mamawh tak chu a ni. Kan siam ṭhat theihna kawng chu BJP chauh hi a ni. A ṭha ni tih chu mipuite hian kan hmu vek tawh a, amaherawhchu mipuite hi kan luhlul laklawh a, BJP lam hawi kan duh tlat lo a ni. A ṭha a ni tih hre reng chunga, a lam kan hawi duhlo tlat hi a pawi takzet a ni. Education lamah hmasâwn kan la mamawh hle a, Ṭhalaite hmakhua ngaitu Pu Modi-a sorkar support hi a hun tawh hle a ni. A sawi chauha thamral ṭhin politician kan tam lutuk hi a pawi a, a taka thawk ṭhin politician hi kan ramin a mamawh hle a ni. A dik chu duk, a diklo chu diklo tia ṭang ngam huaisen tak ram hruaitu kan neih a ngai a, NGO leh Kohhran lamin an duhlo tih vang ngawta lo zawm ve mai ai chuan kan ram tana ṭha tura kan hriat reng lam hi kan support a hun tawh a ni," a ti.
Pu Vanlalhmuaka chuan, "Kan rilru leh kan taksa ah hian thianghlimna kan nei tur a ni a, khaw chhung tihfai leh vawn thianghlimte hi kan nunah a bet tlat tur a ni, tih hi Pu Modi-a sawrkarin 'Swachh Bharat' kaltlanga a thil tum a ni. BJP hi Hindutva nen min khaikhin fo a, ka sawi duh chu, kan buaipui chu 'Viksit Bharat' (Developed India) zawk hi a ni. Kum 2047 ah chuan India ram hi 'Developed' ramah siam kan tum a, chu lam chu kan hawi ṭhup zawk a ni. Party dangte hi chuan 'Hindutva' an ruih chilh tlat a, keini erawh chuan 'Development' kan ruih chilh thung a ni," a ti.
Pu Hmuaka chuan sawi chhunzawmin, "India ram mipui kum 70 chung lam zawng zawng tan PM Ayushman Bharat kaltlangin cheng nuai 5 thleng a thlawna damlo inenkawlna chu Pu Modi-a sawrkar chuan a tlangzarh tawh a ni. Mizorama mi retheite tam takte kan chhawr ṭangkai ngei ka beisei, mi retheite chawikan, an mamawh ang hmasâwnna thlen hi BJP thil tum chu a ni, Hindutva lam kan buaipui hman ve lo, mi retheite engzat nge chawi kan an nih ang? hna neilo te'n hna an hmuh phah angem? Hnathawk tur engzat nge awm ang? tih lam hi Pu Modi-a sawrkar buaipui a ni a, tu project mah kan hrek lova, hmasâwnna dik leh ṭha thlen theih nana project thawh hi kan buaipui chu a ni. BJP-te chuan India ramin hmasawnna kawng an zawh mek ah hian Mizoram hi 'Development' ah hian kan khua a har bik lutuk ang tih a hlauhawm a ni," a ti bawk.
