Thingphun uar ila, a enkawl zui pawh kan mawhphurhna ah i ngai ang u - Pu Cheemal Siva Gopal Reddy, IAS

 Green Mizoram Day 2025 lawngtlai ah hman a ni

Rauthla 11.06.2025 (Nilaini) : Vawiin khan Mizoram District hrang hrangah Green Mizoram Day hman a ni a. Lawngtlai District ah pawh hmun dang ang bawkin ‘Ruahtui khawl nan thing i phun ang u” tih thupui hmangin Green Mizoram Day 2025, District Level Committee Lawngtlai bultumin ‘Green Mizoram Day’ hi hman a ni a . Hemi ni pual in Lawngtlai District Deputy Commissioner Office kawt ah inkhawm tawi hman a ni a. Pu K.Lalthanzara, Executive Secretary, LADC in hun kaihruaiin Lawngtlai District Bawrhsap leh hairman, District Level Committee on Green Mizoram, nibawk Pu Cheemala Siva Gopal Reddy, IAS chu khuallian a ni.

            Khuallian chuan Green Mizoram Day hi kum tin kan hmang thin a. Thing pawh thahnem tak kan phun tawh bawk a. Heng kan thingphun te hi a enkawl zui kawngah kan thangharh a ngai hle a, kumin ah pawh thingtiak eng emaw zat kan phun leh dawn a ni a, rilru leh ngaihtuahna thar pu a, thahnem ngai taka thawkchhuak turin kal khawm te chah a. He kan ram hi ram nuam leh chhenfakawm a siam tur chuan thingphun leh enkawl kawngah mimal tin mai hian pawimawhna kan nei vek a. Mimal, Kohhran, tlawmngai pawl leh sawrkar te pawh thingphun lamah harhtharna nei ila. Kan pawimawhna zawn hi hria a, theihtawp kan chhuah chuan kan ram hi ram nuam takah kan siam thei a ni, a ti.

Pu Cheemal Siva Gopal Reddy, IAS chuan, ram hmasawnna hnathawh hrang hrang avangin kan ramngaw nasa takin a chereu mek a. Tin, Lo nei a eizawng tam tak kan awm a, kan lo hal te bakah ram kan tihkan thin avangin kan ramngaw tha tak tak te a chereu mek zel a. Hei hian nungchate bakah mihringte tan harsatna kawng hrang hrang in a thleng mek a ni, ati a. Chu kan ramngaw chereu mek venna atan chuan thingphun kan uar a, ram nuam leh hrisel zawk siam tura ramngaw kan neih that hi a pawimawh hle a ni. Chuvangin, thingphun hi uar zual sauh sauh ila. Tuna thingphun tura kan chhuahkhawm a, thing kan phun hi duh tawk mai lova, enkawl puitling ngei turin department hrang hrang te chu a chah nghal bawk a ni.

        Green Mizoram Day - hmannaah hian kangmei chhuak tur ven kawnga thawk tha khua pathum hnenah  'Village Level Fire Prevention Award 2025' hlanna neih nghal a ni. Lawmman hi Khuallian Pu Cheemala Siva Gopal Reddy, chuan hlanin, lawmman  dawngtute chu

1. Thaltlang VC : Rs. 50,000 + Citation

2. Ngengpuikai VC: Rs.  30,000 + Citation

3. Sangau -II  VC : Rs. 20,000 + Citation

Pu C. Thanliana, DCF (WL) Mizoram, chuan Green Mizoram Day - puala thu intiamkamna sawiho a kaihruai  a. 

Green Mizoram Day pual inkhawmna neih zawh  hian Lawngtlaia Department hrang hrang ten  thingtiak phun hnatlang an nei nghal a.  NH 02 - Saikah 'L' leh Chawntlangpui inkar kawngpui dungah thingtiak - 390   an phun a ni. Thingtiak phun hi a tam zawk 'Mesua ferrea ( Herhse)' Mizoram State Tree - niin, Thingtiak phun tak te hi  hi Environment, Forest & Climate Change Department, LADC ten an tum a ni.