Rauthla July 22.2025 (Thawhlehni) : Vawiin khan Mizo Zirlai Pawl (MZP) te chuan an rorelna sangber dawttu Federal Council Vawi 59-na a an thurel bawhzuina chhunzawm zelin Aizawl Press Club ah thuthar thehdarhtute an kawm.
MZP President Pu Lalthianghlima chuan, MZP Federal council in a lo rel tawh angin NHIDCL hnathawh hi a that tawk loh avangin, a that zawk theihna nan MZP-in ma la chhunzawm rawh se, tiin a lo rel tawh a. Hemi chungchangah hian MZP te chuan July 17, 2025 khan NHIDCL Executive Director, Virendra Jakhar chu sawipui tumin kawng an dap a. Mahse, chawlh a lo lak avangin an hmu thei ta lo a ni.
MZP chuan Mizoram ei leh bar lakluhna kawngpui pawimawh em em, kal hleih theih loh khawpa a chhiat laia NHIDCL hotupa ber Executive Director-in August ni 7 thleng chawlh ala daih mai hi hriatthiam har a ti hle a. Mizo mipuite min hmuhsitu NHIDCL Executive Director hi Mizoram a awm tlakah MZP chuan a ngaih loh bakah, a deputation term a tawp tawh avangin, a term pawhsei a remti lova. NHIDCL Executive Director, hi Mizoram-ah lo let leh tawh lo turin a hriattir nghal a ni, an ti
