LOK SABHA MP, PU RICHARD VANLALHMANGAIHA'N BLOOD DONATION BUS PE
Rauthla 5th July, 2025 (Inrinni) : Tukin zingkar khan Lok Sabha MP Pu Richard Vanlalhmangaiha chuan Aizawl Civil Hospital Blood Bank hman turin Rs. Nuai 18 man Blood Donation Bus (Tata Winger, 12 seater) a pe a, Bus hi Association for Voluntary Blood Donation (ABVD) President Pu C. Lalnunnema'n a dawng.
Pu Richard Vanlalhmangaiha, MP (LS) chuan, "Tun hmain State dangah thisen hi a thlawna pek a awm meuh lo a, an lei ṭhin a ni. Tun hnuah pawh an chhungte leh thian ten an mamawh a nih lem loh chuan thisen hi a thlawnin an pe lo a tih theih awm e. Mizoramah erawh tun hma atangin kan Kristianna leh tlawmngaihna lan chhuah tir nan, a thlawna thisen pek hi kan intihhmuh nasa hle a, hei hi chhawm nun deuh deuh a ṭha hle. Helama thawktute pawhin midang nun chhan nana rawngbawlna tak tak a ni tih hre rengin, kan theihtawp i chhuah zel ang u," a ti.
Pu C. Lalnunnema chuan, "MP zahawm takin Blood Donation Bus a pekna hun kan hmang thei hi a lawmawm hle a. Mizoramin MP kan neih tawh zingah MPLADS fund atanga Blood Donation Bus min pe hmasa bertu a ni a, Thisen pek ngaipawimawh mi MP kan nei hi a lawmawm hle a ni. Pu Richard-a hi MP a nih hlim khan AVBD hmingin Blood Donation atana hman tur MPLADS atanga Bus min pe turin kan dil a. Kan vawikhat dilnaah rem min tihsak nghalin vawiinah Bus kan dawng thei ta hi kan lawm tak zet a ni. Kum 2007 khan Pu Vanlalzawma MP a nih laiin hma min laksak a. Hindustan Petroleum Corporation Limited (HPCIL) CSR min dil chhuahsakin Blood Donation pualin Mini Bus min pe a. ACH Blood Bank-in ṭangkai takin kum 18 chuang zet an hmang a, khawl thil te a lo ni nen, a lo hlui ve ta a. Tunah MP Pu Richarda'n a fund ațanga Rs. Nuai 18 chuang man Bus tha tak min pe hi ropui kan ti tak zet a ni," a ti a.
AVBD President chuan, "Mizorama thisen petute hi Kohhran ṭhalai te, Zirlai te, NSS volunteer te, YMA te, Police te, Armed Forces te leh tlawmngai pawl hrang hrang te bakah Political Party te an ni ṭhin a. Mimal petu regular donor tam tak an awm bawk a. Kum khat chhungin hmun hrang hrangah, a bik takin CHA Model Blood Bank hian Blood Donation Camp an nei tam em em ṭhin a. He bus hi chutianga thisen pek runpui huaihawt nan ṭangkai taka hman a ni dawn a. Bus thar hian a thlawna thisen pek kawngah hmasawnna min thlensak ngei kan ring tlat a ni. Thisen pek ngai dam lo tam tak hi thisen pek saktu nei ve lo an ni ṭhin a. Kum 2024-25 chhung khan a thlawna thisen pek hi 93.71% a ni a. Kumin hian target insiam lehin thisen pek zawng zawng atangin 94% chu a thlawna pek a tlin ngei kan beisei a ni," a ti bawk.
Bus inhlanna programme, Civil Hospital Blood Bank kawtzawlah hman hi Pu K. Zothanpara, Vice President, AVBD chuan a kaihruai a; Dr. Lalchhuankimi, Sr. Med. Supt., CHA-in lawmthu sawina hun a hmang a. Pu Lalbiakthanga Pachuau (k-99), AVBD Sr. Adviser; Blood Bank thawktu te, ZPM General Headquarters hruaitu te leh Venghlui aṭanga MP ṭawiawmtu ten he hun hi an hmanpui a ni.
