Rauthla 16.09.2025 (Thawhlehni) : CSS hnuaia thawkte chuan nimin khan Joint YMA Field, Vaivakawn-ah sorkara an thil ngiatte tih hlawhtlin sak phutin Sit-in Demonstration an nei.
All Mizoram Centrally Sponsored Scheme Employees Co-ordination Committee huaihawtin sit-in demonstration hi neih a ni a, AMCECC hruaitute chuan Regularization of Centrally Sponsore Scheme (CSS) Employees Scheme, 2024 chu CSS Employees-ten an la hman theih lohna chhan chingfel turin sorkar lamin hmalakna engmah an la neih loh thu sawiin, sorkar hotute nen pawh mumal taka sawihona an neih loh thu an sawi bawk.
DP&AR Minister hnenah tunhnai khan an harsatna leh an thil phutte an thlen thu CSS employess hotute chuan sawiin, sorkarah lehkha representation thehlut tura DP&AR Minister-in a rawn angin an thehlut tih an sawi a, chu an lekha thehluh pawh chu a bo zui niin an sawi bawk a, hetiang a nih zel avang hian loh theih lohin Sit-in Demonstration chu an nei ta tih an sawi a ni.
CSS hnuaia hnathawkte hian ‘Dan lo ang a lak’ tia Chief Minister-in Independence Day lawmnaa a sawi chu na an tih thu sawiin, CSS hnuaia thawkte hi dan ang thlap a lak kan ni a, dan lo ang a lak kan awm chuan, dan lo ang a latute chu zawng chhuak a, action na taka lak ni rawh se, an ti bawk.
CSS hnuaia thawkte hian nimin vek khan Mizoram hmun hrang hrangah sit-in demonstration hi an nei bawk a ni.
Lawngtlai District ah CSS hnuaia thawkte hian sit-in demonstration hi Lawngtlai khawpui mai bakah Sangau, Bualpui ‘Ng’, Lungpher South leh Chawngte ah te an huaihawt bawk a ni.
AMCECC-in an lungawi lohna chhan an tarlante :
April 15 -17, 2025 chhunga pen down strike neih tuma sawrkarin representation thehlut tura min ngen angin DP&AR Minister hnenah ni 19.5.2025 khan thehluh a ni a, kan representation thehluh chu a thlenna tur official hnen thleng lovin kawng lakah tihbo a ni. Hei hian sorkarin min ngaihsak lohzia leh engahmah min ngai lo a ni tih a lantir.
Regularisation of CSS Employee Scheme, 2024 chhuah hnu lawkah, min dan chepna tur a ruahman office memorandum khirh khan tak mai DP&AR in a rawn ti chhuak leh hi sut leh turin vawi tamtak kan ngen tawh. Tun thlenga sut ala nilo hi mak kan ti in CSS employee-te hmuhsitna lian tak a ni.
Sawrkarin Regulari-sation of CSS Employee Scheme, 2024 min siamsak a, kan lawm em em laiin a scheme neitu lo zawk, Health Worker MR/PE te, Regularisation of CSS Employee Scheme, 2024 hmanga mi 31 dah ngheh an ni hi hriatthiam harsa kan ti hle. A scheme neitu zawk min hman tir duh loh laia scheme neitu ni lo MR/PE zawkte awlsam taka an hman tir mai hi hriatthiam harsa kan ti a ni.
Sawrkarin scheme implement a nih hunlai mil ang zel leh, framework anga qualify ngeite kan thawh laia Chief Minister-in Independence Day lawmna ah leh Govt. Aizawl College function ah CSS employee-te chu dan loa lak anga min sawi hi hriatthiam harsa kan ti. Dan loa lak an lo awm a nih chuan dan loa latu chu chhuichhuah kan phut tlat a ni, an ti
All Mizoram Centrally Sponsored Scheme Employees Co-ordination Committee huaihawtin sit-in demonstration hi Aizawl khawpui bakah Mamit District, Kolasib District, Champhai District, Lawngtlai District, Lunglei District, Siaha District leh Saitual District ah te neih a ni.
Hetih lai hian GAD chuan nimin khan Administrative Department te hnenah lekha thawin, nimina Mizoram sawrkar hnuaia CSS hnuaia thawkte’n sit-in demonstration an huaihawt thu tarlangin, ‘Sawrkar ruahmanna siam kalh zawnga hmalaknaah CSS hnuaia thawkte hi tel lo tura tih an ni” an ti.
Hetiang anih avang hian GAD chuan Administrative Department-te chu an hnuaia CSS Employee-te nimina an attendence record chu tlai dar 4 hma ngeiin, a tul anga hmalak anih theihna atan GAD Deputy Secretary hnenah thehlut turin an hriattir a ni.
All Mizoram Centrally Sponsored Scheme Employees Co-ordination Committee ten District hrang hrang a Sit-in demonstration an buatsaih chu an kal tha hle a ni.
All Mizoram Centrally Sponsored Scheme Employees Co-ordination Committee hruaitute chuan, tun thlengin sorkar nen inbiakna ala awmlo a. Chuvangin naktuk, ni 17.9.2025 atangin Tiam chin awmlo (indefinite strike) a kal tur a ni tih memberte an in hriattir a. Mahni thawhna hmunah tumah kal loh nise, an ti a. An kal lehzel dan tur thu ah hruaitute thu ngaihchan zel tur ani, an ti.
Tarlan tawh angin sorkar nen inbiakna mumal engmah an la neilo a. Members ten theihtawp chhuaha lungrualna lantir a, sorkar kan koh ei ngei theih nan tang hram hram turin kan in ngen nawn leh a ni e, tiin thuchhuah an siam bawk ani.
