Rauthla 09.09.2025 (Thawhlehni) : Hmar Students' Association (HSA), General Headquarters hruaitute chuan vawiin khan Chief Minister Pu Lalduhoma chu a office-ah an hmu a, thil pawimawh chi hrang hrang an sawipui.
HSA hruaitute chuan kumin December ni 3 - 5 chhung a Saipum, Sinlung Hills, Mizoram a General Assembly leh Sikpui Ruoi an hman turah Chief Minister chu khuallianah an sawm a, Chief Minister chuan harsatna dang a awm loh chuan a lo inngaihtuah tur thu a lo hrilh a.
Pu Lalduhoma chuan, inkalpawhna tih hmasawna'n leh Zofate impukhatna tura hmalakna kal zelah Mizoram sawrkarin Aizawl leh Tuithaphai (Churachandpur), Manipur inkarah helicopter service tir an tum thu leh Churachandpur-ah Mizoram house sak thuai an tum thute HSA hruaitute hi a lo hrilh a ni.
Mizoram sawrkarin Mizoram leh Tipaimuk (Manipur) inkalpawhna pawimawh NH-2 (Formerly 54) a Tuivai bailey bridge (Unity Bridge) a dawh sak chungchangah HSA hruaitute chuan lawmthu an sawi a, Mizoram Hmar lam inkalpawhna kawng a bik takin Serkhan - Bhaga road a Saipum - North Hlimen inkar leh Tuirial - Mauchar inkar kawng siamthat te, khaw thenkhatah tui supply tha zawk a awm theina'n leh development chak zâwka kal theihna'n a hma laksak tûrin Chief Minister hi an ngen a ni.
HSA General Headquarters chuan September ni 6, 2025 khan Sinlung Hills Council Conference Hall, Aizawl-ah 32nd Executive Council an neih a, ram leh hnam hmasâwnna leh zirlaite hmasâwnna tur thil chi hrang hrang an rêl a ni.
Chief Minister hmuhnaah hian HSA hruaitute hi HSA Assembly Speaker Pu L Rothanglien Khawbung in a hova, Adviser to the Chief Minister (Political) Pu Lalmuanpuia Punte, MLA leh Mizoram a HSA hruaitu thenkhatin an ṭawiawm a ni.
HSA GHQ aiawhte hi Vice President Josef V Tuolor hovin, General Secretary Lalringsan Darngawn, Assistant General Secretary James Pusing, Public Relations Secretary Zothanmawii Zote, Central Executive Committee (CEC) Member Jacob Amo leh HSA Jiribam JHQ General Secretary Khuongremthang Hmar te niin, nimina ram hruaitute an kawmnaah Sinlung Hills Council (SHC) Chief Executive Member (CEM) Ricky Lalremsanga'n a tawiawm bawk a ni
