Rauthla 18.09.2025 (Ningani) : Lawngtlai District AIDS Prevention & Control Committee (DAPCC) bultumin nimin khan 'IEC Campaign leh HIV Test Drive Campaign 2025' hawnna chu Chandmary Inpuiah neih a ni a. Pu Donny Lalruatsanga, Lawngtlai Bawrhsap chuan hmanpuiin, Campaign-hawnna hi a nei.
Pu Donny Lalruatsanga chuan, zirlaite chu ram leh hnam innghahna an ni tih inhriaa, ruihhlo laka fihlim tur leh ram leh hnam tana mi tangkai leh chhuanawm nih tum tlat zawk turin a fuih a, ruihhlo hmansual avanga kai theih natna hrang hrang laka fihlim tura chahin, inchiuna thianghlim lo hman bakah a hun lova mipat hmeichhiatna hman hian HIV/AIDS kai theihna hun remchang tak a awm ani tih hria a, mahni inthunun fo turin zirlai kalkhawmte chu a chah a ni.
Bawrhsap chuan khawvel changkannain a tha leh tha lo zawnga nghawng a neih nasat zia tarlangin, a thalo zawng hian mimal, chhungkua leh khawtlangah harsatna a thlen nasa hle a ni, a ti a. A bik takin HIV/AIDS vei an tam ta lutuk chu veiawm a tih thu sawiin, Ruihhlo do kawngah harh thar a hun tawh hle a ti.
Ruihhlo do kawngah Sawrkarin theihtawp chhuahin, NGO leh Kohhrante pawhin theihtawp an chhuah reng a, heti chunga HIV/AIDS vei an pungta zel chu veiawm a tih thu tarlangin, Ruihhlo do kawngah mitinin mawhphurhna an nei tih hrechiang turin a chah. Pu Donny Lalruatsanga chuan HIV/AIDS in min rûn mêk lai hian tumah inthlahdah theih a ni lo a, lungrual taka do ho a tul a hle a, Ruihhlo do kawngah bul i tan thar leh ang u tiin kalkhawmte, NGO, Kohhran leh Lawngtlai mipuite a sawm nghal bawk.
Dr. Lalramhluna Tochhawng, Sr. Medical Officer, chuan kalkhawmte lawmna thu sawiin, Pi S.Ramdinengi, Councellor, ICTC chuan HIV/ AIDS chungchangah zirtirna a pe a. Pu H. Lalthakima, PM Core Composit, chuan ' Awareness on Substance Abuse' tih thupui hmangin zirtirna hun a hmang bawk.
Lawngtlai District ah hian HIV/AIDS vei hian pun lam a pan zel tih theih tur a ni a. Kumin January - August thla chhung khan thisen test mi 2490 atangin HIV positive mi 54 hmuhchhuah an ni a. Chung mi 54 zinga mi 28 chu inchiu-na thianghlim lo hman atang kai an ni. Heng HIV positive hmuh chhuah thar te hi Kum 30-49 inkar an tam ber a. Tun thleng hian Lawngtlai District a HIV avanga nunna chan hi mi 52 an awm tawh a ni
