LAWNGTLAI BAWRHSAP LEH LAWNGTLAI DISTRICT VILLAGE COUNCIL ASSOCIATION HRUAITUTEN THUTKHAWM NEI
Lawngtlai, 11th September, 2025 : Vawiin khan Pu Donny Lalruatsanga, Lawngtlai Bawrhsap leh Lawngtlai District Village Council Association hruaituten DC Office Chamber-ah thutkhawm an nei.
Pu Donny Lalruatsanga chuan Lawngtlai District Village Council Association hruaitute chunga lawmthu sawinna neiin, Lawngtlai District tana theihtawp chhuahpuiah a sawm a. VC- ten vengchhunga mawhphurhna an neihte tha taka hlen tura ngênin, sawrkar tân a kut leh ke tak tak an nihna hre reng turin a chah a. Hmasawnna awm tura a bul thut ( grassroot) pawimawhna tarlangin, sawrkar hmalakna hrang hranga lo tawiawm fo turin a sawm a. Bawrhsap chuan Lawngtlai District - tân a kawng hrang hranga hmasawnna hnathawhah tha taka thawhho zel a beisei thu a tarlang bawk.
Thutkhawmah hian thil pawimawh tak tak sawiho nghal a ni a. Ranvulh khuahkhirh kawngah tha zawka thawhhona awm se tiin, a bik takin Ui khuahkhirh chungchang chu veiawm an tih thu an tarlang a. Hemi kawngah hian Sawrkar order chhuak chu Police leh Magistrate lamin bawhzuiin, khawpui chhunga Ui chhuak a awm leh awm loh enfiah thin ni se, a tul anga dan hmanga hrem thin nise an ti a ni. Vengchhung faina chungchang sawiin, Mizoram Cleanliness Competition - lo awm leh turah Lawngtlai District - in dinhmun tha zawk a hauh theih nan theihtawpa tan lâk tlân ni se an ti a. Hemi kawngah hian District Administration, LADC leh VC - te nen lungrual taka thawhho ni se tih a ni a. Vengchhunga faina hnatlang thawh bakah, hlawhfa ruaia vengchhung tihfai dân kawng ngaihtuah ni se an ti a ni.
Raltlan chungchang sawiin, Sawrkarin 'Biometric Identification' a kalpui mek chu tha an tih tlân thu ngaihthlak a ni a. Sawrkar piah lamah Village Council - tin ten a tul dan angin mahni venchhungah ruahmanna siam nise an ti a. Lawngtlai District chhungah remna leh muanna a awm zel theih nan tha taka thawhho ni se an ti bawk.
Vawiin hun hmannaah hian Lawngtlai District Village Council Association hruaitute an tel kim tha hle a, inhmelhriat tirna hun hman nghal niin, Pu Donny Lalruatsanga chuan lawmthu sawina neiin hun a khar.
