Rauthla 13.09.2025 (Inrinni) : Vawiin khan Prime Minister Pu Narendra Modi-an Bairabi-Sairanh Rel service a hawnna ah Mizoram Chief Minister Pu Lalduhoma pawhin thusawiin, India ram Prime Minister in Mizoram hmasawnna ngaihtuah a, Rel service min rawn Hawn sak a, hmasawnna hrang hrang Lungphum min rawn phun sak chu lawmawm a tih thu a sawi.
Chief Minister Pu Lalduhoma pawhin thu sawiin, vawiin hi Mizoram tana ni chhinchhiahtlak leh hriatreng tawh tur a ni a. Prime Minister Pu Narendra Modi-an a hmun ngeia kala min rawn hawnsak hian, Mizoram leh hmarchhak bial tana a inpekzia a tilang a ni. Rel kawng thar leh rel service tharte hian India ram laili nen inpawhna thuk zawk min siamsak dawn a, sum leh paiah hma kan sawn pui hle ang. India ramah huapzo takin hmasawnna hna kalpui a nihzia a tilang bawk. Vawiina min hawnsak zirna in pahnih leh a lung min phumsak hmasawnna hna thar parukte pawh hi Mizoram mamawh em em, kawng tam taka kan tangkaipui turte an ni. Mizoram hmasawnna tur thil kan sawi apiang hi Prime Minister hian inhawng takin min ngaihthlaksak thin a, a chungah hian kan lawm thin hle.
Railways Minister Pu Ashwini Vaishnaw, he rel kawng a puitlin theih nana theihtawp min chhuahpui rengtu chungah pawh kan lawm a, a hming hi kan hrereng tawh ang. Tlangrama rel kawng, leiverh leh leihlawn tam tak awmna sial hi thil awlsam a ni lo va, hnathawh ropui bik a tling a ni. He hna ropui tak thawktu Railway Board, Engineer leh workers te an chhuanawm hle.
Chutihrualin, August 2023 a he rel kawng siam laia vanduaina tawka nunna chan ta kan thiante kha kan hrereng a, a pawi kan la tibang thei lova, an chhungte kan tawrhpui takzet a ni, a ti.
