Ocotber 2-3, 2025 hian CYLA khelmual ah
Ticket man Rs 500 leh Rs 50 man a ni dawn e
Rauthla 17.09.2025 (Nilaini) : Mizoram a Football inelna sangber Mizoram Premier Leaque Season 12, Round 10 chu Central YLA khelmual ah Dt 2-3.October,2025 hian khelh a ni dawn ta.
MPL Season 12 ah hian Club pariat an awm a. Chung zinga club paruk te chu Aizawl khawpui chhung Club te an ni a. Club pahnih dang hi chu Lunglei leh Lawngtlai District atangin a ni ve thung a.
MPL Season 12 hi Round 14 khelh tur a ni dawn a. Round 10 tih loh zawng hi chu RG Stadium Aizawl ah khelh a ni ang.
Lawngtlai District Football Association ten MPL Season 12- Round 10 an thlenna tur atan hian Organising Committee te din niin Lawngtlai District Bawrhsap Pu Donny Lalruatsanga chu Chairman niin, ama kaihhruaina hnuaiah club hrang hrang lo mikhual dan tur te, match awmna ni a security leh thil tul pawimawh hrang hrang te ngaihtuah a ni a. Tunah hian inbuatsaihna pawh peih fel thawkhat tawh a ni bawk.
Inkhel en tur te hian ticket an lak ngei ngei a ngai dawn a. Ticket hi chi hnih a siam niin Rs 500/- man leh Rs 50/- man te a ni a. Ticket Rs 500/- man hi VIP seat niin Pavilion ah thutna siam sak an ni dawn a. Ticket pakhat hi Rs 50/- (Black & White) hi mipui a nawlpui in an lei tur a ni ang. Hei hi khelmual thutna siam (Gallery) ah an thu ve thung ang. Tin, zirlai naupangte erawh uniform ha a,inkhel en tura an kal anih chuan an luh man hi a awm lo ve thung dawn a ni.
October 2, 2025 hian match hnih a awm dawn a. Match hmasa zawk hi Dar 12:00 noon a khelh tan tur a ni ang a. Mizoram Police FC leh Saikhamakawn FC ten an khel dawn a ni. Match hnihna hi Dar 3:00 Pm a khel tura ruahman niin I-Leaque club pahnih Aizawl FC leh Chanmari FC ten an khelh ve thung ang.
October 3,2025 (Friday) hian match hnih tho khelh leh a ni dawn a. Match hmasa zawk hi Dar 12:00 noon ah khelh a ni ang a. Dinthar FC leh SYS FC (Lunglei) ten an khel ang. Round 10 a match hnuhnung ber hi Dar 3:00 pm ah khelh a ni dawn a. Lawngtlai District in MPL club kan neih awmchhun leh hmasa ber MLS FC leh Kannan FC ten an khel ve leh thung dawn a ni.
Inkhel hi Zonet Cable ten Zonet Empai ah LIVE in an pe chhuak leh dawn a. Amaherawhchu, Live an pek chhuahna hi lei a ngai ve thung ang.
Tun ah hian Round-7 khelh zawh ani ta a. Aizawl FC te hi table chung berah awmin, vawi 7 khel tawhin Point 19 an hmu tawh a. An hnuaiah chiah hian vawi 7 khelh tawh Chanmari FC te awmin point 14 an hmu bawk a. Table pathum-na ah hian vawi 7 khel tawh Dinthar FC te hian point 13 bawk an hmu a ni. MLS FC te hian vawi 7 khel tawhin point 9 an hmu a, table ah pali-na dinhmun an hauh mek a ni.
Saikhamakawn FC te hian vawi 7 khelh ah point 9 an hmu a, panga-na dinhmun an hauh mek a, Kannan FC te hian vawi 7 khel tawhin point 7 an hmu a, table ah parukna dinhmun an hauh mek bawk a ni.
Mizoram Police te hian vawi 7 khel tawhin point 6 tho an hmu a, table ah pasarih-na dinhmun an hauh mek a. SYS Lunglei te hian vawi 6 khelh ah point khat chiah hlawhchhuak in table ah a mawngphah ah an awm mek a ni.
MPL Season 12 table kan en chuan Saikhamakawn FC te hi Goal Difference ah MLS FC aiin an tha zawk a. Nimahsela, MLS FC te hian Saikhamakawn FC te hi 3-1 an lo hneh tawh avangin Head to Head an en avangin MLS FC te hi table ah an chungnung zawk a ni.
