Rauthla 11.Sept,2025 (Ningani) : Vawiin khan Chief Minister Pu Lalduhoma chuan a office-ah Pu PC Vanlalruata, Minister, Irrigation & Water Resources leh department officials te chu an hmalakna hrang hrangte a sawipui.
Chief Minister chuan, kuthnathawka eizawng kan tam avangin kan loneituten tui tha an mamawh em em a. In department hian an tana hmalak theihna in nei ngah hle. Vawiina kan sawi hmalakna tur leh hmachhawpte pawh hi ram ro tling tur vek an ni a. Project tha tak tak nei phawt ila, kan bawhzui zel dawn a ni, a ti.
An thil sawi tlangpuite chu:
1. Tuidai Multipurpose Project, Mamit, NABARD atanga sum hmuh Rs. 29.6 Cr. senga thawh tur chu a thawktu tur zawnna kalpui mai tawh tur a ni a.
2. Mat Valley Integrated Water Resource Management & Climate Resilient Irrigation Project, Serchhip DPR chu peih thawkhat tawh niin, a bawhzuitu tur Core Group din a ni. Tuilak atan te, thlai chawmna atan te, tuihna humhalhna te leh Eco Tourism te ngaihtuah chunga DPR hi duan niin Brahmaputra Board lamin state budget pawn lam atangin a thawhna tur an ngaihtuah ang.
3. Brahmaputra Board kal tlang bawk hian Tlawng lui Springshed Rejuvenation kalpui dan tur dap mek a ni.
4. Central sorkar chuan Leilet/Phai thlai tharchhuahna hmunah science thiamna sang zawk hmanga tuisem kual, scientific distribution of water resources hi ram pumah kalpui a tum mek a. Mizorama a thawh khatna turin Champhai leh Mat phai command area atan project thehluh phawt a ni.
5. Mizorama National Hydrology Project leh State Water Informatics Centre kal zel dan tur pawh sawi a ni.
6. Ngur - Vapar Multipurpose Dam siamna tur hmun chu Forest Clearance buaipui tan tura tih a ni.
7. Serlui B HEP tui hman hnu tam tham tak luangral thin hi a thlang lama thlai chingtute tana hman tangkai dan tur zirchian tha an ti.
