Association For Voluntary Blood Donation Lawngtlai Rising Day hmang

 Association For Voluntary Blood Donation Lawngtlai Rising Day hmang

Rauthla 10.11.2025 (Thawhtanni) : Vawiin khan 'Association For Voluntary Blood Donation (AVBD) Lawngtlai District- te chuan an dincham vawi 15-na DC Conference- Hall an hmang a.Pu David Lalrinawma, Addl DC chuan khuallian niin a hmanpui.

        Pu David Lalrinawma chuan, thisen pek chu mizo tlawmngaihna nen a thil inhmeh tak, kristian nihna nen pawh a kalkawp tlat anih avangin thisen pek kawngah hmasawn zel turin theihtawp chhuah a ngai hle a ti a. Thisen pe thei lote pawhin midangte thisen pe tura zirtir kawngah tha an thawh thei a ni, a ti. Association For Voluntary Blood Donation- hruaitute leh Blood Bank- lama thawktute inpekna ropui a tih thu tarlangin, inpekna tak tak nena thawk an nih angin, fak an phu tak zet a ni, a ti. Pu David Lalrinawma chuan taksa that leh hrisel lai huna thisen pek kawnga tan la thar zel turin kalkhawm te leh Lawngtlai mipuite a sawm nghal a ni.

Pu Elvis Lalthang-zuala,President, Association For Voluntary Blood Donation, Lawngtlai District - pawhin thusawiin, AVBD chu Kohhran Thalai Pawl leh NGO kalkhawm in a din a nih thu a tarlang a. Thisen mamawhtute'n a hun taka thisen an dawn theihna tura thisen pek pawimawhna leh tulna tlangaupui tu an nih angin thisen pe thei lote pawh he pawl ah hian an leng vek a ni, a ti. Kumin December Ni 1 atanga ni 20, chhung hian Krismas puala Thisen pek runpui kalpui tur a nih thu sawiin, thalaite thisen pe turin a sawm nghal bawk.

        AVBD, Lawngtlai District - te hian kumin January - October, chhung khan Blood Donation Camp vawi- 39 an nei tawh a. District Hospital Lawngtlai Blood Bank ah hian a thlawnin thisen Unit - 994 pe tawhin, replacement - Unit 247 an pe bawk a ni. Heng thisen te hi Lawngtlai khawpui chhunga Hospital pathum bakah Siaha District Hospital Blood Bank - ah te pekchhuah a ni bawk.

Association For Voluntary Blood Donation hi May 10, 1991 khan Mizoram ah din a ni a. Tichuan, 2010 atang khan Mizoram District tam zawk ah din tan niin, thisen mamawhtu ten a hun taka thisen an dawn theihna tur leh thisen pek pawimawhna sawiin awarenss an kalpui thin a ni.