MZP, HADRI leh ACCC TANGKAWPIN MIZORAM CHHUNGA REFUGEE TE TANPUINA TUR HUMANITARIAN HUB ENABLEMENT TLANGZARHNA HUN NEIH A NI
Rauthla 10.11.2025 (Thawhtanni) : Vawiin November ni 10, 2025 India zing dar: 5:30, Brisbane, Australia chawhma dar 10:15 khan, Mizo Zirlai Pawl(MZP), Humanitarian & Development Research Initiative(HADRI) leh Australia Chin Community Council(ACCC) tangkawpin, Mizoram chhunga refugee tanpuina tur *Humanitarian Hub Enablement* tlangzarhna hun, The Precinct Fortitude Valley, Queensland, Australia hmunah neih a ni a, he hunah hian, MP(Rajya Sabha) Pu K. Vanlalvena leh MZP General Secretary, Pu C. Lalhmingsanga te'n an telpui a ni.
He hunah hian, MZP President, Dr. C. Lalremruata chuan online(zoom) hmangin he Humanitarian hub in a thil tum leh Mizoram chhunga rawn raltlante dinhmun tlangpui sawina hun neiin, Mizoram chhunga chengte chuan theihtawp chhuahin an lo kuangkuah tawh thu a sawi.
MP(Rajya Sabha)Pu K. Vanlalvena chuan, Australia sawrkar(Federal Government) leh Australia chhunga Doners ho chu he Humanitarian Hub kaltlang hian Mizoram chhunga kan unau rawn raltlante tanpuina pe turin a sawm a ni.
Managing Director of HADRI & G.S ACCC Pu Lawmthang pawhin thusawina hun neiin, Mizoram mipuite'n a Myanmar atanga raltlante tha taka an lo dawnsawnna leh enkawlna avangin lawmthu a sawi a, Mizoram in tha taka an lo dawnsawn dan pawh sawiin, Australia sawrkar hnenah Mizoram chhunga raltlante tana che chhuak ve turin a sawm nghal a ni.
Senator of Australia, Paul Scarr pawhin thusawina hun neiin, MZP in a raltlante alo buaipui dan a hmuhin, MZP chungah lawmthu sawiin an hmalakna a dah san hle thu a sawi a, Australia sawrkar(Federal Government) hnenah, raltlante tan Humanitarian aid Mizoram chhunga raltlante tana sanction turin sawrkar a nawr tur thu a sawi.
HADRI CEO- Mitchell King, ACCC President -Pu Ramtintheia, Managing Director of Village Support Ltd., & Founder and CEO of Athiei Foundation Beny Bol OAM te'n thusawina hun an nei bawk.
Airlink Regional Representative for Asia and the Pacific -Claire Leow te'n presentation neiin, MZP, HADRI & ACCC te'n thawhhona thuthlung chu MZP aiawhin General Secretary Pu C. Lalhmingsanga'n a signed a ni.
Asst. G.S of ACCC & GS of Matu Community Council, Queensland -Muan Hlui chuan he tlangzarhna hun hi a kaihruai a ni.
